KANINDOT gud diay og kinabuhi ning tulo ka mga police officials sa Police Regional Office (PRO) 7 nga gipangrelibohan sa bag-ong natudlo nga hepe sa Philippine National Police (PNP) nga si Police General Archie Gamboa.
Tiaw mo bay permi diayng magduwa og golf kining tulo bisan sa panahon sa tingtrabaho.
Ang tulo giila nga sila si Police Colonel Dennis Artil, hepe sa Comptroller Division; Police Lieutenant Colonel Dennis Bad-ang, hepe sa Finance Service; ug Police Lieutenant Colonel Glenn Mayam, hepe sa Police Drug Enforcement Group 7.
Human masakpi ang pangabuso sa tulo, wa dayon magpadiki-diki si Gamboa sa pagrelibo kanila ug gimando-an gilayon kini sa pag-report ngadto sa Personnel of the Holding and Accounting Unit sa Camp Crame sa kaulohan.
Hayahay pa sa pulis. Kay samtang ang ilang mga kauban mirisgo sa ilang kinabuhi aron pagpatuman sa balaod ug nakigbatok sa mga dautang elemento, apan sila nakaako sa paglingaw-lingaw nga naduwa og golf, ang paboritong sport sa mga adunahan.
Sa press conference, gibutyag ni Gamboa nga sigon sa inpormasyon nga miabot sa iyang buhatan, kining tulo magduwa og golf matag Huwebes ug Biyernes. Duna say higayon nga sa adlawng Miyerkules, depende kon laayon kini sa opisina.
So kon atong basihan ang pamahayag ni Gamboa, masabot nga taodtaod na kining maong binuhatan sa tulo hinungdan nga iya kining gipapanid-an.
Di usab nato masalikway ang posibilidad nga daan na siyang nahibawo niini bisan pa niadtong wala pa siya matudlo nga PNP chief ug gihuwat lang ang tukmang higayon.
Pangutana. Wa ba diay masayod ang hepe sa PRO-7 kalabot niining binuhatan sa tulo? Nganong wa man ni mapakgang?
Hinaot nga dili lang ni kutob sa imbestigasyon ug mapahamtang ang tukmang silot.