POSIBLENG mapugos ang kadagkuan sa Department of Health DOH-7 nga mangayo og abag sa kapulisan kon ugaling adunay mga guest sa mga hotel ug resort nga posibleng di mokooperar sa ilang pamaagi kon ugaling sila dudahang magpakita og simtomas sa novel coronavirus (2019 NCorv).
Kini ang pamahayag ni Dr. Shelbay Blanco, medical officer sa DOH 7, human sa panagtigom nga gipahigayon sa Kagamhanan sa Dakbayan sa Lapu-Lapu, mga hotel ug resort owners sa dakbayan sa Biyernes, Enero 24.
Ang Lapu-Lapu maoy sagad dagsaan sa mga langyawng turista nga gikan sa nagkadaiyang suok sa kalibutan, hilabi na gikan sa China.
Sa pagkakaron, ang gibuhat sa mga city health official sa dakbayan ug DOH 7 mao ra ang pag-monitor sa mga guest sa mga hotel ug resort sa dakbayan sa dunay simtomas sa 2019 NCorv virus.
Apan giklaro ni Blanco nga wa pa silay natala nga mga langyawng guest nga nagpakita og simtomas.
“As much as possible, we would like to deal with that in a nice and diplomatic way but if ever dili gyud malikayan, there will be uncooperative guest or clients, we might ask the help of PNP. That’s why they are also included in our incident command system structure,” pagpasabot ni Blanco.
Samtang ang secretary sa Lapu-Lapu Philippine Tourism Ethnic Chinese Guild Hall Corporation nga si Vicky You mibutyag nga bisan kon daghan tinuod nga mga Chinese national sa dakbayan, hilabi na nga nagsaulog sila sa Chines New Year karong adlawa, Enero 25, di ra angay nga mabalaka ang publiko kalabot niini.
Kini gumikan kay sa ilang monitoring, way Chinese national nga anaa sa dakbayan nga gikan sa Wuhan, ang dapit nga maoy gigikanan sa mikatap karon nga 2019 NCorv.
Kadaghanan sa mga Chinese national nga anaa sa dakbayan gikan sa Fujian province nga dunay lima ka oras nga biyahe gikan sa Wuhan kon magsakay og train sumala pa ni You.
Iya hinuong giawhag ang iyang kaigsuonang Chinese national sa pagtawag sa ilang buhatan kon ugaling adunay mga kakulian sa panglawas aron dali silang maatiman.
Ang mga contact number mao ang 032-3833789 ug 032-5206666.
Giangkon ni You nga napanglantawan nila nga ubay-ubay pa nga mga Chinese national ang moabot sa dakbayan aron magbakasyon sanglit holiday sa China sulod sa walo ka adlaw gumikan sa pagsaulog sa Chinese New Year karong adlawa, Enero 25.
Sa Pebrero 3 na sumala pa kasagaran manguli sa ilang nasod sanglit mao usab kini ang adlaw nga balik na ang trabaho.
Kini samtang ang DOH 7 nagpaabot pa sa resulta sa laboratory exam sa sample nga nakuha gikan sa 5-anyos nga batang lalake nga taga Wuhan, China, apan nianhi sa Dakbayan sa Sugbo uban sa iyang inahan.
Hayan karong adlawa ma-release ang resulta.
Ang bata nga naa pa sa ospital di pa ma-release hangtod nga masuta kon unsa nga matang sa coronavirus ang mitakod kaniya. (GCM)