SUPERBALITA CEBU

Kanhi pulis ‘nangilkil’, na-entrap

NAPUSASAN ang kontrobersyal nga kanhi pulis atol sa entrapment operation sa mga sakop sa Regional Intelligence Division (RID) 7 ala 1 sa hapon niadtong Huwebes, Enero 23, sa kasong robbery extortion.

Ang gisikop mao si kanhi Police Corporal Carlito Luage Donque Jr, 36, taga Block 11, lot 16, Deca Homes 4, Barangay Bankal, Siyudad sa Lapu-Lapu.

Gireklamo siya sa usa ka aplikante sa pagka pulis sa Police Regional Office 7 nga taga barangay Balao, lungsod sa Barili nga gipangayoan og P40,000 bugti sa kasigurohan nga makasulod sa pagka pulis.

Sa dihang nasayod na ang PRO 7 sa gihimo ni Donque, gisakyan nalang kini sa reklamante nga mouna siyag hatag og balor P10,000 ug kon maka sulod na, pun-an na niya kinig P30,000.

Tuod man, gihulog sa aplikante ang kwarta sa usa ka money transfer ug sa dihang gikuha na ni Donque ang kwarta, siya gipusasan dayon sa mga operatiba nga nag-atang nang daan sa pagdawat sa kanhi pulis.

Matod ni Police Brigadier General Domingo Cabillan, deputy regional director for administration, nga iyang gipasaligan ang aplikante nga makasulod siya sa serbisyo bugti sa bayad ug siya na ang moasikaso sa mga papeles.

“Ang pasalig niya nga mangayo siyag kwarta para makapasar siya despite the fact nga daghan ang mag apply. Murag assurance niya nga makapag take oath ang atong police applicant,” matod ni Cabillan.

Giingong di lang usa ang nabiktima ni Donque sanglit adunay nakuhaan og P10,000 nga ka batch ra usab sa reklamante nga gipakuhaan na usab og pinanumpaang pamahayag.

Giangkon usab, matod pa sa kanhi police, nga pito ka mga aplikante ang iyang gi haylo pinaagi sa Messenger sa Facebook, apan wa pa matino kon kini nakabayad ba usab.

Nipaila siya nga police lieutenant ug mahimo siya nga makapasulod sa serbisyo tungod kay aduna siyay access sa PRO 7 gamit ang iyang ngalan.

Moabot ngadto sa 250 ang quota karon sa Police Regional Office 7 nga mahimong pulis apil na niini kadtong duha ka mga aplikante ang nasulod na sa listahan ug gitakdang manumpa na sa sunod semana.

Nadestino kaniadto si Donque sa PNP Aviation Security Group-7 apan niadtong July 2017, aduna kini gidakop nga babaye nga negosyante sulod sa airport sa Mactan kay adunay nakita nga bala sa bagahe niini.

Giareglo matod pa ni Donque aron di mapasakaan og kaso bugti sa dakong kantidad.

Apan ang babaye higala diay sa usa ka opisyal sa dakbayan sa Davao hinungdan nga gipaubos siya sa imbestigasyon.

Gipa-report siya sa buhatan sa Aviation Security Group, apan wa na mobalik sa trabaho.

Pagka Oktubre 2018 gi taktak na siya sa serbisyo tungod sa kasong absent without official leave (AWOL).

Nasulod siya sa serbisyo niadtong 2007 ug sulod lang sa 11 ka tuig gitaktak sa pagka pulis.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph