KON walay pahuwayay ang mga durugista sa dakbayan sa Talisay, gitugbangan usab kini sa Talisay City Police Station (TCPS) uban sa Regional Mobile Force Batallion (RMFB)- hinungdan nga 27 ka mga durugista ang nangasikop.
Kini atol sa lain na usab nga sunodsunod nga Oplan Limpyo Talisay sukad Huwebes sa gabii, Enero 23 hangtud na Biyernes sa kaadlawon, Enero 24.
Tuod man 13 sa 27, giila sa TCPS nga mga High Value Individual (HVI). Gihimo nila ang 11 ka managlahi nga buy bust sa Barangay Tangke ug Lawaan 3.
Gisugdan nila kini alas 9 sa Huwebes sa gabii hangtud na sa Byernes sa buntag.
Lakip sa mga nasikop ug giila nga high value target ug giingong kauban sa Obrero family, si Joma Obrero, 20, kinsa nasikop sa Lawaan III. Nakuha gikan kaniya ang mga pinakete sa shabu nga mobalor og P152, 320.
Apan hugot nga nihimakak si Obrero, kinsa nisaysay sa mga tigbalita nga wa siya malakip sa pamilyang Obrero nga dakong mamaligyaay og drugas sa Talisay City.
Ang inahan ug tulo ka mga anak nga Obrero lakip sa 46 nga nasikop niadtong Enero 11, diin nakuhaan sila og kapin sa P5 milyones nga shabu.
Panalipod ni Joma Obrero, nga igo ra siyang nagpaayo sa iyang motor sa dihang nahitabo ang operasyon.
Susama usab niini ang pasangil sa laing giila nga HVI nga si Jojie Pulgo sa mao gihapon nga barangay, kinsa nasakmitan og mga ilegal nga drugas nga mobalor og P241,060.
Matud ni Pulgo kinsa mang-ihaway og baboy sa City abattoir nga di siya mamaligyaay, apan niangkon nga mogamit, ug katapusang gamit niadtong Disyembre 2019 tungod sa kadaghang’ giihaw .
“Wa gyud koy labot ana. Sa una nadakpan ko pero gi-planteran raman sad ko ato. Mogamit ko pero dugay na. Niadtong Disyembre (ang katapusang’ gamit) kay way tulganay mi sa kadaghang giihaw,” pasangil ni Pulgo.
Apan usa sa gitumbok nga HVI nga si Jericho Ann Bacalso niangkon nga pito ka bulan na siya sa pagpamaligya og drugas human siya nawad-an og trabaho isip planner.
Matod niya nga igo ra siya mangangkat sa ubang baligya nga drugas, ug sa matag 15 ka gagmay nga pakete sa shabu, igo ra siya molimpyo og kita ngaP1,800.
“Ginagmay ra man na akoa. Patungan ra gud nako akong angkat og P1,800. Gituyuan naman gyud ni nako, dili nako mahadlok (sa gihimo nga mga operasyon),” gitug-an ni Bacalso.
Si Police Col. Roderick Mariano ang pangulo sa Cebu City Police Office ug Talisay City Mayor Gerald Anthony Gullas nituyo sa TCPS ug naabtan pa ang mga dinakpan sa wala pa sila pasakai og kaso Biyernes sa udto.
Matod ni Mariano nga sa nakuha niya nga report gikan sa hepe sa TCPS, Major Gerard Ace Pelare, nga kasagaran gikan sa Cebu City ang suplay sa ilegal nga drugas sa Talisay.
Hinungdan nga makig-alayon pa sila sa Cebu City Police Office. Si Gullas kinsa nakakita sa mga dinakpan nipasalamat ug subli nga nipadayag nga mosuporta sa kon unsa pay kinahanglan sa mga pulis diha sa operasyon.
Matod niya nga daku na nga kalampusan ang gihimo sa pulis, human nga dul-an P9 milyones na ang nangsakmit ning bulana.
Gawas sa mga shabu, nakasakmit usab ang mga pulis og usa ka .45 kalibre nga armas ug laing usa ka 9mm pistol. (FMD)