DUHA sa upat ka gikatahapang mga tulisan nga mangigoay sa Indian national nga mga tigpatanto nadakpan sa ginukdanay tali sa mga ginsakpan sa Carbon Police Station niadtong Huwebes sa hapon, Enero 23, 2020 sa Escaño st., Barangay Ermita, Dakbayan sa Sugbo.
Ang grupo nga giingong maoy tigpanulis sa mga tigpatanto sa Carbon market area gikan nitulis sa usa ka tigpatanto samtang nag-inangkasay sa duha ka mga motorsiklo.
Si Police Capt. Alvin Llamedo, hepe sa Carbon Police Station 5, niila sa mga suspek nga aila si Jhan Raymar Villa, 25, ug Jose Cabigas Jr., 49 pulos kasamtangan nga nagpuyo sa Camella Homes sa Barangay Maghaway, Dakbayan sa Talisay.
Si Villa lumad nga taga lungsod sa Aurora, Zamboanga Del Sur samtang si Cabigas lumad nga taga lungsod sa Argao.
Matod pa ni Llamedo nga usa kini ka grupo sa notadong mga tulisan nga dunay upat ka mga miyembro. Dugang ni Llamedo nga Huwebes sa hapon, gitulis ang usa ka Indian national sa Carbon area.
Laing Indian national nakahigayon sa pagsunod sa mga tulisan ug daling nitaho sa mga pulis sa Carbon nga naa ang mga suspek sa Barangay Ermita.
Dali nilang gipahigayon ang hot pursuit operation ug naabtan ang upat nga nag-angkasay sa duha ka mga motorsiklo.
Ilang naapsan sila si Villa ug Cabigas sa may atubangan sa buhatan sa Cemvedco sa Escaño st.
Ang laing duha ka mga kauban, usa ini lider sa grupo, wa na maapsi sa mga sakop sa Intelligence and Detective Management Bureau (IDMB), apan ila na kining gigukod sa lugar nga gipaingnan. (BBT)