SUPERBALITA CEBU

Siomai, siopao sa Leyte gipugngan

Mary Rose Vincoy. (File photo)

MOABOT sa 1, 030 ka buok pork siomai ug pork siopao nga gisulod sa tulo ka mga kahon gikan sa Rehiyon 8 nga gidudahang ipamaligya dinhi sa Sugbo gipabalik human nasakmit sa mga sakop sa Regional Veterinary Quarantine Officers (RVQO) sa barko nga Lite Ferry gikan sa Palo, Leyte sa Pier 4, Enero 22, 2020.

Ang maong mga produkto way mga brand ug posible nga ang gigamit nga sagol niini gikan sa mga lugar nga apektado sa African Swine Fever (ASF).

Sa 2020, mao kini ang labing una nga higayon nga may nakadunggo nga mga produkto sa baboy sa pantalan nga buot ipamaligya sa Sugbo.

Matod ni Dr. Mary Rose Vincoy, African Swine Fever (ASF) Task force head sa Probinsya sa Sugbo nga gibalik kini sa Rehiyon 8 tungod sa nagpadayon nga pagpatuman sa Executive Order No. 27 nga gi isyu ni Gobernador Gwendolyn Garcia sa Disyembre 13, 2019.

Ang executive order nag-ban sa mga pork ug pork related products gikan sa Luzon ug mga dapit nga wa magpatuman og ban sa mga karneng baboy gikan sa Luzon.

“Ug dili na nato siya butangan og mga tawo nga mag-monitor diha, lisod na kay masudlan man ta. We have 12 seaports nga constant plying from Region 8 and most of that daily ang trips while we coordinate with coastguard. Some of the veterinary quarantine nga na assign or na transfer sa Region 8 at least they are aware unsa atong thrust dinhi sa Cebu Province”, matod ni Vincoy sa Superbalita Cebu sa Enero 24, 2020.

Ubos sa mando nga gisubay karon sa mga sakop sa ASF task force ug LGU, gidili ang pagpasulod sa bisan unsang produkto sa baboy nga gikan sa Rehiyon 8 human sa paglibkas na sa ban sa mga silingang rehiyon hinungdan nga mas bukas na nga makapasulod og produktong baboy nga gikan sa Luzon, lugar kon asa padayon ang pag katap sa kagaw sa ASF.

Ang Hunta Probinsyal nipasar usab og ordinansa pagpatong og multa nga moabot og P5,000 sa mga makalapas sa mando o ba kaha mag- atubang og kaso o pagka bilanggo sulod sa unom ka tuig.

Dugang ni Vincoy nga padayon ang monitoring sa mga pantalan sanglit mao kini ang sagad agian sa mga produkto nga dinaghan ang karga.

“Naa man guy magpalusot naay uban na confiscate pero more on pang balay lang like mga sud-an. Unya pangitaan man ka og papers pero sa Executive No. 27 man, with or without papers, dili gyud na pwede ang pork products”, matod ni Vincoy.

Tungod niini, gimandoan ni Vincoy ang mga veterinary quarantine officers ug lokal nga kanunay nga alerto ug mas pahugtan pa ang pagsusi sa mga karga dili lang sa mga pantalan apan lakip na sa mga paluparan.

“We want nga the local government units should also do their part if they have seaports pag protect sa ilang mga kaugalingon kay the provincial government will always be there but dili man enough ang atong tawo nga mu cover 24/7sa 51 towns and cities maong their participation is very crucial”, matod ni Dr. Vincoy.

Sa sunod semana, gikatakda usab ang pag-dispose sa nahabilin pa nga mga produktong baboy, sagad mga de lata nga nasakmit sa task force sa mga dagkong tindahan sa Sugbo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph