WALA nagpahuraw ang LGSA Davao sa ilang kalaban nga CEC Dragons aron makuha ang kampeyonato sa Sinulog Cup 2020 didto sa dakbayan sa Cebu niadtong Enero 21, 2020.
Gipalong nila ang kalayo sa Dragons sa iskor, 72-56, diin nabulsa ang premyong P50,000 sa 13 under dibisyon nga kategoriya.
Nanguna sa Davao si Francis Magnaye nga mitala og 13 puntos, 12 rebound ug 3 assist ug siya ang giilang most valuable player (MVP).
Apan pakyas ang LGSA sa 18 under dibisyon human niyukbo sa samang kontra sa iskor, 70-67, apan nakabulsa hinuon og P30,000 premyong salapi.
Mga pambato sa 13 under mao sila Junel L. Balansag, Mike Francis Bangoy, Kurt Michael L. Eguna, Butch Klarence Franco, Jeong Hun G. Kim, Garryl Dave M. Layaguin, Meguelito R. Manuel, Jemar M. Pojas, Joseph Keith M. Realino, Jan Louie G. Sajol, Lemuel A. Jumamoy, Bret T. Torreon, ug Giero M. Velasquez.
Ang team gigiyahan ug gitimonan sa head coach nga si Isiac Gravador ug giabagan ni assistant coach Jigger Saniel.
Ang mga duwa gipahigayon sa Cebu Eastern College Gym sa Leon Kilat Street, Cebu City. (Marizz Robilla-Perez)