Talento: Disiplina

“BISAN kinsa nga nahigugma sa disiplina nahigugma sa kahibalo; apan kadtong nagadumot sa pagbadlong buangbuang,” Mga Panultihon kapitolo 12, bersikulo 1.

Good day, SuperB friends and family! Kumusta inyong mga beauty? Sama sa naandan, nagmantiner sa kagwapa ning inyong higala problema na lamang sa nagtan-aw kung mouyon siya ha-ha!

Napanalanginan ang akong panghunahuna ug dughan sa wali sa simbahan niadtong milabay’ng Sabado, Enero 18 busa dili nako ihikaw ang kahigayonan nga ipaambit kini kaninyo kay basi diay og mapanalanginan pod kamo sa mensahe nga napaminawan nako.

Daghang giistorya sa pulpito apan ang pulong, “discipline” ang ningdulot sa akong kabukugan busa paminaw mga silingan.

Adunay pipila ka mga kahulogan ang pulong nga “disiplina.” Una, kung sayop ang atong binuhatan, disiplinahon gayud kita dayon sa atong mga ginikanan pinaagi sa koreksyon o pagtudlo kung unsay husto dala kusi gamay sa bugan, migo. Pwede kini kaniadto kay karon masumbong na kita og pangabuso sa mga kabataan kung ato silang pasakitan. Makasuhan tag pina-live.

Ikaduha, disiplina pod ang paghatag og hustong training o pagbansay sa usa ka atleta sa laraw sa isports o sa bisan kinsa nga moapil og contest isip pagpangandam, higala.

Ikatulo, ang mga nagtuyog papayat o katong dunay mga sakit sa kalawasan, ang pagdisiplina sa kaugalingon aron matulog sa saktong oras, pagdiyeta o pagkaon husto ra (dili habhab) sa katuyoang mas mabaskog ug mahimsog apil sa atong lista.

Ang disiplina sa pag-eskwela ug pagpugong aron dili mag uyab-uyab kay bata pa included kaayo ilabi na sa mga minyo nga bisan nagpangatol ang gibati; nagadisiplina og hugot sa ilang uwag aron ang pamilya dili mabungkag.

Kanang nasuspendi sa trabaho kay adunay mga bayolasyon, disiplina gihapon ang terminolohiya ang ginagamit usahay, igsuon. I know, daghan pang mga kahulugan ang inyong nahibaloan apan kini lang sa atong hisgutan, okey?

Seriously, ang Bibliya mismo sa Mga Hebreohanon 12: 10-11 nagkanayon, “Gibadlong kami nila sa makadyot sama sa ilang gihunahuna nga labi ka maayo; apan gidisiplina kita sa Dios alang sa atong kaayohan, aron kita makaambit sa Iyang pagkabalaan”. Walay disiplina nga daw makalipay sa oras, apan masakit. Pagkahuman, bisan pa, naghimo kini usa ka ani sa pagkamatarung ug kalinaw alang sa mga nabansay niini.

Basin og moingon mo nga buotan ko kay sige kog hisgot sa mga pulong gikan sa Bibliya. Intawon, maut kaayo kog batasan, higala mao naningkamot kog basa sa Bibliya sa panghinaot nga mahayagan ug mabag-o pinaagi sa Pulong sa Ginoo.

Balik ta sa disiplina, sama sa ingon sa Bibliya, walay bisan unsang porma sa disiplina nag “easy” kay magsakripisyo gayud kita, pare aron mahitabo ang atong mga katuyoan.

Gani, ang mga ginikanan nga dili kahibalo modisiplina sa ilang mga anak, nagbaton og mas seryosong problema. Ang mga anak pod nga dili magpadisiplina, magmahay inig abot sa hustong takna.

Sa atong pagtapos, nagpahinumdom ang libro sa Mga Panultihon nga ang bisan kinsa nga wala magtagad sa pagbadlong mahisalaag apan ang nahigugma sa disiplina nahigugma sa kahibalo.

Ang kahibalo maoy giya sa pagpuyong matarung ug malipayon busa kita mismo ang magdisipina sa atong mga kaugalingon. AMEN?