KORONADAL CITY -- Gidagsa sa daghang tawo ang lubong sa overseas Filipino worker (OFW) alas 11 sa buntag, Huwebes, Enero 23, kinsa gipatay sa nasud Kuwait.
Sa wala pa ang lubong sa biktima nga si Jeanelyn Villavende sa Norala Public Cemetery sa Norala, South Cotabato nanguna sa Santos nga Misa si Marawi siege survivor Fr. Jerry Tisoy Suganob.
Daghan ang nanghilak atol sa misa sa brutal nga pagpatay sa biktima sa iyang agalon sa Kuwait.
Matud ni Abelardo Villavende nga andam siya nga moadto sa Kuwait ug saksihan ang silot kamatayon sa duha ka amo nga maoy mipatay sa iyang anak.
Gikonsidera sa amahan nga bayani ang iyang anak gumikan mao kini ang nakapatandog sa baruganan ni Presidente Rodrigo Duterte alang sa deployment ban sa mga OFW sa Kuwait.
Atol sa parada sa patay nga lawas sa dalaga paingon sa sementeryo, daghang taga Norala ang misabwag og bulak dungan sa pagtulo sa luha sa kalooy sa niluog nga pagpatay sa biktima.
Nanghinaut ang pamilya Villavende nga makab-ot nila ang tinuod nga hustisya sa dalaga uban sa tabang ni Presidente Rodrigo Duterte. (Edgar E. Fuerzas)