MIPATALA sa kuwerpo sa kapulisan ang usa ka 40-anyos nga babaye human siya gipunay og baklad ug ginahimas ang iyang pribadong parte sa kalawasan sa ilang silingan sa higayon nga maligo ug magsugat sila.
Saysay sa usa ka Roselyn (bansagon gitago), 40-anyos, residente sa Holy Place, San Antonio Village, Barangay Matina Crossing, Talomo District, Davao City nga dili na niya maantus ang nahitabo kaniya sanglit daghan na kining higayon nga gihimo sa suspek nga si Michael, 45-anyos.
Sa blotter nga natala sa Talomo Police Station, ulahing higayon nga nanghimas ang suspek dihang nanablay si Roselyn kinsa nakatapis og tualya alas 6 sa buntag sa milabay nga adlaw.
Giingong diriyot nahubo ni Roselyn ang tualya dihang perte niyang dagan kay mipadung na sab si Michael kaniya.
Una niini, dihang naligo pa si Roselyn, iya nang namatngonan nga naa na sab sa kilid sa ilang kasilyas nangtikaw-tikaw og mibaklad ang iyang silingan hinungdan nga nagsinina na siyang naligo.
Sa mga milabay nga semana, mao sab kini ang gihimo sa suspek diin gibaliwala lang sa biktima gumikan dili niya gusto og eskandalo sa ilang dapit nga maoy masumsuman sa istorya.
Bulan sa Disyembre 2019, katulo na gihimas ang biktima sa suspek, nga iya na sab nasumbong sa ilang purok leader.
Human sa pagpatala sa biktima, gimandoan siya sa kapulisan nga mopatala sa barangay ug ipatawag ang suspek aron didto sila mahusay. (Jeepy P. Compio)