SUPERBALITA DAVAO

Grade 9 student, nausab ang nawong sud sa lungon

DAVAO CITY. Ang igsuon sa namatay nga si Edith (tuo) hugot nagtuo nga ang espiritu sa iyang igsuon atua na sa kiliran sa Labaw’ng Makagagahum bisan og ang patay’ng lawas niini gituohang nakuha sa mga dautang elemento. (Hulagway ni Dexter T. Visitacion)

DAVAO DE ORO -- Wa gilayon ma-embalsamar sa punerarya ang 15-anyos nga babayeng namatay human nagpadamgo nga di siya ipailawom sa maong proseso.

Ang insidente nahitabo sa Purok 10, Sitio Ambawan, Barangay Osmenia, Compostela sa nahisgutang probinsiya.

Ang namatay giila nga si Edgarda Atamosa, alyas Gaga, Grade 9 student sa San Miguel National High School ug molupyo sa Purok 10, Sitio Ambawan, Barangay Osmenia.

Ang igsuon sa namatay nga ginganlan og Edith, 25, nagsaysay nga nagsugod sa panakit sa tiyan ang balatian sa biktima apan sa dihang gipatan-aw og mananambal giingon nga napasmuhan lang kini hangtud nga migrabe ug lakip na ang ulo sa biktima nagsakit na usab.

Ang biktima, matud pa, gidala sa ospital apan way makit-ang hinungdan ang doktor nga mihiling.

Sumala pa nga migrabe ang kondisyon sa biktima sa higayon nga kini ampoan, unya masuko kay kuno sakitan kung makadungog og mga pulong pag-ampo ug masulawan na usab kini sa krus.

Dugang saysay ni Edith nga misulti kaniya ang iyang manghod nga adunay buot nga mokuha niini nga tulo ka mga itom nga tawo nga buot modala kaniya ngadto sa ilang gingharian aron nga ipuli sa nagkasakit nga reyna.

Gidala ang biktima sa Holy Infant Community sa Poblacion sa maong lungsod aron hingpit nga maampoan ug mabantayan ug dinhi nasaksihan sa pamilya sa biktima ang giingong mga milagro sa gihimong pagtabang ngadto sa biktima.

Alas 6 sa gabii, Enero 12, kalit nga migahi ang biktima ug sa dihang gihakwat, apan naglisud ang lima ka mga tawo nga nagdayong sanglit grabe kabug-at niini.

Matud pa nga na-comatose ang biktima ug gidala sa Davao Regional Medical Center sa siyudad sa Tagum.

Alas tres sa hapon, Enero 15, ang amahan sa biktima nga si Edgar, 59, nga maoy nagbantay sa anak nga atua sulod sa emergency room, misulti nga iyang nakita nga naglagom na ang mga kuyamoy sa kamot sa anak.

Apan alas tres sa hapon, Enero 18, gideklarang patay na sa doktor ang biktima ug gidala pagbalik sa lungsod sa Compostela alas sais sa gabii sa samang adlaw.

Matud pa nga daghan ang nagtuo nga mabuhi pa ang biktima sanglit daw natulog lamang kini ug humok pa man gihapon ang lawas ug wa mabaho bisan og miabot na sa duha ka adlaw gikan kini gideklarang patay.

Gihimo ang way undang nga pag-ampo pahitungod sa giingong namatay nga biktima sa tinguha nga maluwas kini sa gihimong pagkabilanggo kaniya sa giingong mga dautang elemento.

Human niini, nabatyagan nga migahi na ang patay’ng lawas sa biktima hinungdan nga misugot na ang pamilya niini nga ipa-embalsamar siya.

Pamilya sa biktima nagduda nga ang minatay nga ilang gisulod sa lungon, dili mao ang lawas sa ilang anak sanglit matud pa nausab ang panagway niini ug natiguwang.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph