ANG Davao City netter, Christian Nathaniel Angus mahimong kabahin sa three-member Team Philippines sa 2020 ITF World Junior Tennis Competition (Asia/Oceania Qualifying Zone) karong Pebrero 17 ngadto 22 sa Jakarta, Indonesia.
Ang 13-anyos nga Grade 7, sa St. Paul II College of Davao apil sa laing duha ka top ranked boys 14 and under players base sa updated Philippine Tennis Association (Philta) junior rankings as of December 31, 2019.
Si Davis Alano maoy mogiya sa tim.
Ang inahan ni Angus nga si Lani sa text message sa SunStar Davao nagkumpirma nga motigi ang iyang anak sa World junior qualifying.
“We are preparing all his documents now,” suma niya.
Si Philta president lawyer Antonio Cablitas, niadtong Enero 16, miisyu og memorandum nagngalan nila Carbonilla, Angus ug Lucman nga morepresenta sa nasud sa maong duwa sa Jakarta.
Si Philta secretary-general Romeo Magat, misuwat sa Department of Social Welfare and Development (DSWD) niadtong Enero 20 aron mangayo og clearance nga makabiyahe ang tulo ka junior tennis players nga pulos menor.
Si Angus, produkto sa Philippine Tennis Academy Davao satellite, bag-uhay lamang misalmot sa wildcard entry sa national tryouts alang sa 2020 ITF World Junior Tennis Competition sa Tagum City diin siya ang kampeyon sa 14 and under.
Nagsugod siya og duwa sa tennis sa edad nga 6 anyos ug naimpluwensiyahan sa iyang amahan nga si Dr. Victorio C. Angus, Jr. nga kanhi tennis player.
Niadtong 2018, nakuha niya ang titulo sa boys 12-under category champion sa Dacudao Cup, lakip na elementary boys gold medal sa Davao Region Athletic Association (Davraa) Meet.
Giharus sab niya ang bronse sa Palarong Pambansa 2019 ug silver sa Batang Pinoy qualifying.