DAKO kaayo ta og kabalaka tungod sa pagboto sa bulkang Taal. Kinsa po’y dili mabalaka nianang mabuthan og bulkan ang atong mga kababayan? Atong nakita sa telebisyon ang pagkalisang sa mga lumulupyo didtong dapita, ang pagkamatay sa ilang mga binuhing hayop ug pagkawala sa ilang mga panginabuhian.
Nakita nato nga mura na’g desyerto ang lugar nga kanhing bibo ug lambo, nga ang tanan natabunan na og sulfur ug abo.
Ato sad nakita nga ang linibong lumulupyo didto gipang-evacuate ngadto sa luwas nga mga lugar sama sa evacuation centers, basketball courts, ug didto intawon sila nag-sinardinas. Walay mga pagkaon, mga ilisan, mga pangabuhian, kalipay o tubag sa ilang mga problema. Apan, ang maayo kanatong mga Filipino, mawala man ang tanan, dili gayud mawala ang atong paglaum.
Akong nakita sa social media nga sa ubang mga dapit, adunay katawhan nga mangsablig og tubig nga naka sakyanan nga milabay sa ilang dapit, aron mawala ang mga abo nga nagtabon sa ilang mga samin.
Kaanindot paminawon nga taliwala niining mga hitabo, ginapakita sa atong katawhan ang saktong pamatasan. Matinabangon baya ning mga Pinoy sa tinuod lang, ug mahunahunaon kita alang sa uban. Mao ning usa sa mga panalangin nga atong nakita taliwala sa kalamidad nga gihatud ni Taal.
Sa akong nakita karon sa social media, nagbaga ang traffic sa mga dalan padulong sa dapit sa Taal, kung diin nahimutang ang mga evacuees. Tungod kini sa mga trucks nga nagkarga og mga relief goods alang ngadto sa mga apektado sa bulkan. Kaanindot gayud mahibaw-an nga daghang katawhan ang nagahuna-huna sa panginahanglan sa atong mga kababayan.
Akong nahinumdoman kadtong miaging tuig, kadtong nagsige og linog dinhi sa Davao del Sur. Akong nakita ang mga trucks nga red plates nga naga-convoy nga naghatud og mga hinabang padulong sa mga lugar nga naapektohan.
Ang Davao Mission of SDA pud, naghimo og hiniusang pagtabang alang sa mga nalinogan. Ang tanang ka-iglesyahanan sa tibuok Davao nagpatigayon og pagpanghatag og relief goods kaniadtong Nobyembre 2019. Gisundan kini niadtong Enero 5, ug 12 ug karong adlawa. Kini inyong mga higalang Adventista dili gayud magduha-duha sa pagtabang sa atong katawhan nga anaa sa kalamidad.
Matud pa ni Ginoong Jesus, “...kay Ako gigutom, ug inyong Akong gipakaon... giuhaw Ako, inyo Akong gipainom... nagsakit ako, ug inyo Akong gitambalan... (Matt. 25: 35, 36). Ang paghimo og maayo ngadto sa atong isigkatawo mao’y pagpakita sa batasan sa Dios ug gugma ngadto sa uban.
Kaanindot hunahunaon, higala, nga taliwala niining mga kalamidad, adunay katawhan nga bulawanon ang mga kasingkasing sa pagtabang. Ug kung ikaw adunay pagbati sa pagtabang, ug niapil sa pagtabang, usa ikaw sa mga bidlisiw sa paglaum sa katawhan nga nagakinahanglan niana karon.