DIGOS CITY -- Human sa gipahigayong trail assessment sa Mindanao Mountaineering Federation Inc. (MMFI) ug Digos City Active Mountaineers, giablihan na ang mga trail sa Mount Apo alang sa mga climbers.
Gitakdang ipahigayon ang Mt. Apo Pre-map and Tree Planting Activity karong Enero 30 hangtud Pebrero 2.
Sumala sa MMFI, gilauman nga aduna’y 250 ka mga climbers ang mosalmot sa maong aktibidad.
Apan, giklaro ni Rye Glenn Trinidad, vice-president sa MMFI, nga 50 ka climber lang matag adlaw ang gitugtan nga mosaka sa summit.
Nagpasidaan sab ang Department of Environment and Natural Resources (DENR) nga tumanon ang balaod sa Protected Area Management Board (PAMB).
Giklaro sa DENR nga wala sila’y deklarasyon nga sirad-an ang Mt. Apo trail apan mismong mga lokal nga gobyerno sa North Cotabato diin agianan sa bulkan ang nagsirado niini human ang mga linog.
Apan, nagpabiling sirado ang Kidapawan, Makilala ug Magpet trail sa probinsya sa North Cotabato human sa sagunsong linog sa miaging tuig.
Nagpasidaan sab ang DENR ngadto sa tanang climbers nga istriktong ipatuman sa PAMB ang mga guidelines sa pagsaka sa bulkan ug hugot nga gidili ang pagkatulog sa summit.
Matod ni Jayvee Agas, pamuno sa Regional Public Affairs sa DENR-XI, nga kinahanglang mobaba na ang mga climbers pag-abot sa alas 2 sa hapon ug dalhon sab ang ilang basura.
Dugang sa opisyal nga hugot na nga gidili ang pagkaligo sa “Lake Venado” human pipila na ang nalumos dinhi.
Apan, di basta makasaka ang mga climbers kun dili mokuha og permit sa mga lokal nga gobyerno diin ipailawom sila sa oryentasyon.
Ang Mt. Apo mao ang pinakataas nga peak sa nasud nga aduna’y gihabugon nga 9,692 feet (2,954 metres) above sea level. (Orlando B. Dinoy)