COTABATO CITY -- Buak ang ulo sa habal-habal drayber nga gipusil alas 4:00 sa hapon niadtong adlaw nga Biyernes sa siyudad sa Cotabato.
Giila ang biktima nga si Alimudin Pasawilan Racman, 40-anyos, minyo, habal-habal drayber ug molupyo sa Nayon Shariff, Barangay Poblacion 3, Cotabato City.
Sumala kang Cotabato City Police Director Colonel Portia Manalad nga samtang naglakaw ang biktima sa Anacleto Badoy Street, Barangay Poblacion 3, kalit lamang mibutho ang duha ka wala mailhing tawo ug gipusil kini gamit ang kalibre.45 nga pistola.
Abtik sab nga miikyas ang mga namusil sakay sa motorsiklo paingon sa hilit nga dapit sa siyudad.
Dead on the spot si Racman nga naka-angkon og samad pinusilan sa iyang ulo ug likod nga parte sa lawas.
Wala sab mamay-ungan sa mga sibilyan ang namusil sa biktima nga pulos naka-helmet ug kalit sab ang hitabo.
Personal nga atraso o rido ang gilantaw sa mga awtoridad nga motibo sa pagpatay kang Racman nga padayon nilang gi-imbestigahan. (Edgar Fuerzas)