COTABATO CITY -- Naangol ang lima ka tawo sa nahulog nga pick-up sa pangpang alas 4:30 sa hapon niadtong adlaw nga Biyernes, Enero 24, sa probinsiya sa Maguindanao.
Giila ang mga biktima nga sila Sarip Kugan Kanapia, 48-anyos, drayber; Faiza Kanapia usa ka barangay chairwoman; Edwin Lumenda Sambolawan, 47-anyos, public school teacher ug mga estudyante nga sila Datuwata Kanapia Sambolawan, 16-anyos ug Datu Jasim Kanapia, 15-anyos nga mga molupyo sa Dapantis Rajah Buayan, Maguindanao.
Gibutyag ni Maguindanao Police Provincial Director Arnold Santiago nga samtang sakay ang mga biktima sa usa ka Toyota pick-up nga may plaka nga LAB-5124 kolor itom nga gimaneho ni Sarip Kanapia gikan sa Cotabato City pabalik sa ilang gipuy-an.
Apan pag-abot nila sa Barangay Dulangan, Datu Odin Sinsuat, Maguindanao, nag-overtake kini sa gisundan nga Toyota Innova nga kalit sab nga mihunong.
Gilikayan ni Kanapia ang Innova apan wala na niya makontrol ang manobela ug diritso nga nahulog sa 20 ka tiil nga pangpang kilid sa national highway.
Gisapupo sa mga sibilyan nga molupyo sa maong dapit ang mga samaron og gidala sa Cotabato Regional and Medical Center (CRMC) sa Cotabato City.
Ang mga biktima pulos anaa sa talandugong kahimtang nga naka-angkon og daghanang bun-og, pangos ug bali sa nagkadaiyang parte sa ilang kalawasan.
Sa kasamtangan, ang traffic unit sa Datu Odin Sinsuat PNP ang padayon nga nag-imbestiga kalabutan sa maong hitabo. (Edgar Fuerzas)