KIDAPAWAN CITY -- Nabugtuan sa kinabuhi ang usa ka negusiyante sa disgrasya sa kadalanan alas 4:05 sa hapon, Sabado, Enero 24, sa probinsiya sa Cotabato.
Giila ang biktima nga si Junel Lasaca Cabilin, 26-anyos, minyo ug molupyo sa North Fairview, Quezon City.
Sa taho gikan sa kapulisan sa Makilala, Cotabato nga samtang sakay ang biktima sa iyang Suzuki raider 150 nga motorsiklo gikan sa Digos City paingon sa siyudad sa Kidapawan.
Apan pag-abot sa negusyante sa Purok Pomelo Barangay Malasila, Makilala, North Cotabato gidumbol kini sa laing motor nga nagsunod sa iyaha.
Wala na makontrol ni Cabilin ang iyang gimaneho nga motor ug nabalintong tunga-tunga sa kalsada.
Imbes nga tabangan ang biktima sa wala mailhing drayber sa motor nga nakabangga kaniya abtik kining misibat.
Gisapupo ang negusyante sa mga molupyo sa lugar nga duol sa nadisgrasyahan ug gidala sa Makilala Medical Specialist Hospital apan gideklara kini sa mga doktor nga dead on arrival.
Miliki ang ulo sa biktima og naka-angkon sa daghanang bali ug pangos sa nagkadaiyang parte sa lawas niini nga maoy hinungdan sa iyang kamatayon.
Sa kasamtangan, ang kapulisan sa Makilala Cotabato ang padayon nga nag-imbestiga aron mailhan ang drayber sa motor nga nakabangga sa negusyante. (Edgar Fuerzas)