DAVAO DEL NORTE -- Dako ang paglaum sa usa ka ulitawo nga mubalik sa iyang kiliran ang babaye’ng gihigugma karon nga gitaral na sa korte ang usa sa mga scammers nga nagpaluyo sa Rigen Marketing.
Si Dennis (wa magpabutyag sa iyang apelyedo), 28-anyos nga taga Davao Oriental, usa sa daghang mga investors nga miadto niadtong Enero 24, sa sala sa Branch 1 sa Regional Trial Court (RTC) sa dakbayan sa Tagum aron magpakisayod sa mahimong lintunganay sa himuong pagdungog sa kaso sa giilang founder sa Rigen Marketing nga si Paul Auditor.
Sanglit, subay sa mando sa RTC Branch 1, sa siyudad sa Tagum pinaagi ni RTC Judge Virginia, ang gimando ngadto sa Criminal Investigation and Detention Group (CIDG-Manila) ug sa abogado ni Auditor nga dalhon ang maong CEO scammer sa dakbayan sa Tagum aron atubangon ang mga kasong gisagpa batok kaniya ug sa lain pang mga kaubanan nga naglangkob nila ni Rico Garcia, Dexter Auditor, Leo Perez, Jr., Rodrigo Marquez, Jr., Maita Palma, Mercylun Escobido, ug Rudy Imma Labajo.
Ang hearing gihimo niadtong Enero 24 sa RTC Branch 1, alas 8:30 sa buntag, hinungdan nga gidugok sa daghang mga investor nga buot mabalik ang ilang kuwarta ang Hall of Justice.
Apan, ang maong pagdungog sa kaso ni Auditor gibalhin ngadto sa Davao Del Norte Provincial Jail ug nagsugod alas 3 na sa hapon nga diin si Auditor mitungha nga nakasul-ob og bullet proof vest samtang nakaposas ang duha ka mga kamot.
Gihimo ang pagdungog sa ekslusibong pamaagi nga ang gitugutan nga makasulod mao lamang ang mga hingtungdan nga kalakip sa maong pagdungog ug wala tuguti ang laing mga tawo ingon man ang mga sakop sa media nga buot mo-cover sa gihimong hearing.
Ang investor nga si Dennis nagsulti nga wa na siya maglaum nga makuha pa ang gilauman kaniadto nga 400 porsyento nga interest sa gi-invest nga kwarta apan, malaumon kini nga mabalik ang capital nga iyang gi-invest nga nagkantidad og P450 mil nga unta gamiton sa kasal nila sa iyang hinigugma.
“Niadtong October unta last year ang kasal namo sa akong pangasaw-unon, apan tungod niining Rigen, tungod kay nangandoy ko og mas bonggang kasal, maudlot ang tanan nga lakip ang akong hinigugma nawala sa akong kinabuhi,” saysay sa ulitawo.
Matud pa sa ulitawo nga gibiyaan siya sa iyang pangasaw-onon human nasayran sa iyang hinigugma nga ang kwartang hinagoan sa pagpanarbaho isip domestic helper sa nasud sa Dubai nga halos unom ka tuig nga gitigom alang kasal na-scam sa investment sa Rigen Marketing.
Dako ang paglaum ni Dennis nga mahibalik sa iyang kiliran ang babayeng gihigugma sa higayon nga makuha pagbalik ang kwartang na-invest sa Rigen ug malaumon nga mapadali ang pagdungog sa kaso sa nadakpang scammer apan, wa pa masayri kung kanus-a ang ikaduhang pagdungog sa maong kaso ni Auditor nga kasamtangang gikustodiya karon sa Davao del Norte Provincial Jail. (Dexter T. Visitacion)