Pastor Apolinario palangga sa Kapa members?

DAVAO DEL NORTE -- Dili susama sa gibating kasuko ngadto sa nadakpang chief executive officer (CEO) sa Rigen Marketing ang gibati sa pipila ka mga miyembro sa Kapa Community Ministry International ngadto kang Pastor Joel Apolinario.

Gihimo ang pagdungog niadtong Enero 24, sa upat ka kasong syndicated estafa batok sa founder ug CEO sa Rigen Marketing nga si Paul Auditor hinungdan nga midagsa ang daghang investors nga buot makuha pagbalik ang ilang kuwarta nga na-invest sa kompanya ni Auditor.

Daghan sa mga investors wa mituo sa giingong gisulti ni Auditor atubangan sa korte nga “Not guilty” siya sa kaso sanglit ang pagtuo sa kadaghanan giilad sila sa kompanya ni Auditor sukwahi sa gihimo sa Kapa nga gipangunahan sa Founder niini nga si Apolinario nga gituohan sa kadaghanan nga tinud-anay ang adbokasyang gihimo nga haw-ason ang daghang pobre.

“Kapila na nagsaad-saad og refund si Auditor apan wa gihapo’y nahitabo, asa naman diay to among kuwarta?!, Kadto kang Pastor Joel, klaro man to nga na-freeze ang iyang mga assets mao nga wa nauli sa mga miyembro ang kuwarta apan kining kang Auditor wa ma’y na-freeze sa iya nganong di man ibalik ang among kuwarta?,” ingon sa usa ka investor nga wa nagpaila kinsa P40 mil ang nayabo ngadto sa Rigen.

Nagtuo ang mga miyembro sa Kapa nga investor usab sa Rigen Marketing nga kung ibalik o ipaguwa sa gobyerno ang gi-freeze nga assets ni Apolinario nga kuwarta usab sa mga miyembro mauli gyod kini ngadto sa katawhan sanglit aduna na unta’y mga branches sa KAPA sa wa gikabutyag nga mga lugar nga nagsugod na sa giingong re-entry niadtong bulan sa Oktobre sa miaging tuig.

Sa bulan sab sa Nobyembre aduna nay mga miyembro nga nakadawat sa giingong blessings apan tungod sa giingong mga mahilabtanon subling nauktaba ang inanay nga pagbangon sa Kapa ubos sa laing pangalan nga wa gikabutyag.

Si Myra (dili matuod nga pangalan), 56-anyos nga taga- lungsod sa Montevista hugot gihapon ang suporta ngadto kang Apolinario ug wa siya’y plano nga mopasaka og reklamo batok kang Apolinario sukwahi sa iyang gihimong reklamo batok kang Auditor.

“Nganong kasohan man nako si Pastor Joel nga sayod man mi nga gihimo niya ang tanan aron mauli ang kwarta sa mga miyembro apan unsaon man pag-uli nga gi-freeze man, unta iuli na sa gobyerno kay dili man na ilang kwarta, sa katawhan man na,” saysay ni Myra.

Ang mag-uuma usab nga si Dalmasio nga taga lungsod sa New Bataan, Davao de Oro nga sumala pa naka-invest og kapin P50 mil sa Rigen, dako ang pagtuo nga kung wala mahitabo ang mando ni Pangulong Rodrigo Duterte nga ipa-lock down ang KAPA daghan na untang mga pobre nga sama niya ang nahaw-as gikan sa kalisod tungod kay dakong tabang ang wa’y palyar nga blessings kaniadto sa KAPA nga ilang ginadawatan matag bulan.

Dili sama sa Rigen Marketing nga kuno wala siya’y nadawat bisan kausa sa tulo ka higayon sa iyang pag-invest nga miabot og dul-an P50 mil.

Luyo sa nahitabo, walay plano nga mopasaka og kaso ang mga miyembro sa KAPA ngadto kang Apolinario gumikan palangga nila kini ug ilang nakita nga luyo sa nahitabo, gusto gihapon unta ni Apolonario nga motabang sa mga kabus.