Sugilanon: Si Cheetah

NAG-INUSARA nga nagpuyo si Melanio sa payag nga kabilin sa iyang ginikanan. Nagpabilin siyang ulitawo tungod sa kalisod sa panginabuhi. Ang iyang mga igsuon nanglangyaw sa Manila.

Usa ka adlaw niana nagyawyaw si Melanio kay gikaon sa unggoy ang saging bangan nga gisaarang paliton sa iyang suki. “Kon madakpan ka nako, ihawon tika!” ni Melanio nga gisapot. Naglagot siya nga nagtan-aw sa mga palot sa saging nga nagpasad sa tungod sa punoan niini.

Wala magdugay nadakpan ni Melanio ang unggoy. Iya kining gihiktan aron ibaligya. Sa paglabay sa mga adlaw nausab ang plano ni Melanio nga ibaligya ang unggoy. kay nalingaw siya niini. Nakahukom siya nga buhion ang unggoy.

“Sukad karon tawgon tikag Cheetah,” ni Melanio ngadto sa unggoy.

Kanunay niyang gitudloan og binuang si Cheetah pinaagi sa senyas samtang nagpakaon siya niini, hangtod nagkasuod silang duruha. Mibilib siya sa unggoy kay bisag unsay isugo, motahod dayon kini kaniya. Paglabay sa panahon dili na idlas si Cheetah. Iya kining gipasagdan nga magasuroy-suroy.

Dihay usa ka adlaw nga nagdala og pitaka si Cheetah nga may sulod nga kuwarta. Nahibulong si Melanio kay dakong kantidad ang sulod niini. Tungod sa kawad-on wala niya panumbalinga kon diin kini gikan. Ang importante nga duna siyay salapi nga magamit. Mipalit si Melanio og motorsiklo aron dili na siya maglisod paglugsong ug pagtungas sa bukid.

Milabay ang usa ka tuig. Nabalaka si Melanio kay nawala si Cheetah. Gipangita niya kini sa kasulupan apan wala niya makit-i. Miadto siya sa munisipyo ug nangutana sa estasyon sa kapulisan.

“Sir, aduna kay nabalitaan nga may unggoy nadakpan?” pangutana ni Melanio nga nagsubo.

“Wala man. Sulayi kuno pag-adto sa DENR,” tubag ni Patrolman Dinolang.

Mipauli si Melanio nga nahisagmuyo. Nabalaka siya kon unsay gidangatan sa iyang unggoy.

USA ka adlaw niana nagkagubot ang mga molupyo sa silingang lungsod kay adunay mga tulisan nga napatay sa kapulisan. May kauban kini sila nga usa ka unggoy samtang nanulis. Gisusi ni Melanio ang estasyon sa kapulisan. Iyang nakit-an si Cheetah nga gihigtan kauban sa napatay nga mga tulisan. Nasayran niya nga gigamit ang unggoy sa pagpanulis. Gitudloan kini sa mga tulisan unsaon pagpangawat. Nakahukom ang kapulisan nga ipadala sa DENR ang unggoy.

Nahisagmuyo si Melanio nga mibalik sa bukid. Dili niya mahimong bawion si Cheetah kay usa siya sa mabasol sa krimen nga gihimo niini.

Usa ka gabii nga takdol ang bulan gikuyawan si Melanio kay saba kaayo ang iyang iro nga wala moundang pagpaghot. Milili siya sa bentana ug iyang nakit-an si Cheetah.

“Abi nakog di na ta magkita,” ni Melanio nga daling miabli sa pultahan.

Misenyas ang unggoy nga may dala siyang bag ug paablihan kini. Nakurat si Melanio kay puro bulawan nga alahas ang sulod sa bag. Wala mahimutang si Melanio sa iyang kaugalingon. Nianang pagka buntag nangabot sa iyang payag ang mga pulis.

“Arestado ka! Suspek ka sa pagpangawat!” matod ni Patrolman Carillo human makit-i niini ang kinawat nga mga alahas diha sa lamesita.

“Sir, wa koy labot niini,” esplikar ni Melanio samtang gipusasan siya.

Nabilanggo si Melanio. Giduaw siya ni Cenon, iyang suod nga ig-agaw. “Kumusta ka, Gaw? Ayaw kabalaka kay piyansahan tika,” ni Cenon.

“Asa man ta puwede makahulam og kuwarta?” sukna ni Melanio. “Miadto ko ganina sa imong pinuy-anan. May kuwarta sa imong pitaka ug igo kining gamiton para sa piyansa,” tug-an ni Cenon.

Nahinumdom si Melanio kang Cheetah. Misantop sa iyang hunahuna nga nangawat na sab kini.

Human makagawas sa bilanggoan mipauli si Melanio sa bukid. Samtang nagkaon siya sulod sa iyang payag, nabati niya nga nahagbong ang kaldero sa kusina. Iyang gisusi. Miabot diay si Cheetah nga may kuyog nga laing unggoy. Misenyas kini kaniya nga mabdos ang iyang kuyog pinaagi sa pagpikpik sa tiyan sa kauban niyang unggoy. Igo lang miyango si Melanio nga mipahiyom sa kahimuot.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph