DIHANG gihimo ang pagtuon sa Bus Rapid Transit (BRT) system, usa ko sa mga gidapit sa mga presentation ug forum kalabot ini. Ni-lobby man gud mi nga tugtan ang pagdala sa mga folding bike sakay sa bus. Gipaneguro sa nagtuon nga dunay luna alang sa mga folding biker sama sa gibuhat sa Manila.
Target niadtong panahuna nga magsugdan ang pagtrabaho sa BRT route sa 2016 ug matapos sa 2018. Apan bisan ligid na lang sa bus, way nakita hangtod karon.
Niadtong higayuna, nagtuo kong ang BRT molampos bisan kon mao lang kini ang saligan nga transport system nga molagbas gikan sa Pardo sa south ngadto sa Talamban sa north. Apan sa pagsige nako og research, kini nga transport system palpak diay sa ubang Asian cities. Unya nagastuhan pa og dako.
Giduso sa administrasyong Duterte ang intermodal nga transport system nga tipik lang ang BRT. Di wagtangon ang BRT, apan tipik lang kini sa solusyon sa trapiko. Ang laing mass transport nga giduso mao ang monorail.
Apan mao lagi, mga estorya pa ni sa hangin hangtod karon. Bisan usa pa ka haligi o dapit nga gihawanan, wa pay makita. Human sa pamahayag ni Presidente Rodrigo Duterte, hinaut pang mahinayon kini.
DI RA CEBU CITY
Ang tumong sa mass transportation mao ang pagdasig sa publiko sa di na pagdalag sakyanan kay duna nay paspas nga paagi sa pagbiyahe. Wa ka pay huna-hunaong sakyanan nga maglibog ka asa I-park.
Kon maghisgot ka usab og trapiko, di lang kay ang suliran ra sa Siyudad sa Sugbo ang sulbaron. Gikinahanglan nga paluagan usab ang mga kasikbit sama sa Mandaue, Lapu-Lapu, Talisay, Consolacion ug uban pa. Kon mabara ang trapiko aning mga dapita, mokanit kini sa Dakbayan sa Sugbo.
Ingon niana ka dako ug kakomplikado sa problema. Busa, gikinahanglan usab sa kagamhanan ang dakong pundo aron pagsulbad sa dakung problema. Mao nang nahibung ko ni Cebu City Councilor Joy Augustus Young nga nanaway kang Duterte, human mosulti ang Presidente sa big ticket projects sa pagsulbad sa problema sa trapiko dinhi.
Makita man gud nga ang problema sa trapiko di lang masulbad sa BRT. Nasuwayan na bitaw ni sa ubang mga nasod sa Asya, apan palpak man. Di na gani mapalapdan ang kadaghanan sa mga karsada dinhi, busa gikinahanglan ang ubang pamaagi. Di simple ang problema, dako kini ug komplikado.
BISEKLITA
Apan bisan unsa pa nga transport system manghinaut ming bikers, apilon unta nila sa plano ang biseklita, labina sa pagtugot nga kini masakay, sama sa folding bikes nga gibuhat usab sa ubang mga nasod.
Niini, hayan makuhaan ang abusadong mga drayber sa motorsiklo ug scooter kay mobalik na man sa bike nga makarga. Hinaut pa.