ALAS 8 sa gabii niadtong Enero 12, 2020, naglaray ang mga sakyanan sa parking area sa Mandani Bay Tent sa dakbayan sa Mandaue.
Ang photo booth sa lobby nga gidayandayanan sa mga buwak, ang nisugat sa mga dinapit.
Ang maong adlaw maoy kasumaran sa pagkahimugso ni Arturo C. Hisoler nga mas nailhan isip Buddy.
Si Evelyn Hisoler, kapikas sa kinabuhi ni Buddy kuyog sa ilang mga anak, maoy niatiman sa mga bisita.
Ang unang apo sa magtiayong Hisoler, Zachary Scott Freese Hisoler, dungan nga nakigsaulog kay natawo usab kini sa susamang petsa, 21 ka tuig ang nilabay.
Human sa makabusdik nga panihapon, nikanta si Dandin Ranillo sa iyang inila nga ‘Sinulog, Isyagit og Kusog’ inubanan sa Knapsax Dancers.
Natahasan ang actor nga si Keempee de Leon sa pag-propose og toast.
Ang actress nga si Glydel Mercado ug talent manager nga si Wowie Roxas ang nitimbaya usab sa kasaulogan.
Didto usab ang laing singer nga si Lloyd Umali nga gisundan sa duweto nila ni Keempee sa awit ni Stevie Wonder nga Lately.
Mga paryente ug mga higala ni Buddy ug Evelyn nitimbaya sa linawas ug pinaagi sa video.
Ang Sugbuanong actress ug singer nga si Vina Morales ang nikanta og duha ka medley: una, mga hinay nga kanta ug gisundan sa paspas nga nakaaghat sa pipila ka mga dinapit sa pagsayaw.
Nikanta usab ang kinamaguwangang anak nila ni Buddy ug Evelyn nga si Ma. Arlyne sa awit ni Celine Dion nga Because You Loved Me. Ang anak ni Arlyne nga si Kyaniah Marie H. Romoff nisayaw usab uban ang Knapsax.
Sa party, nihatag sa iyang mensahe si Evelyn. Sa iyang pagpamulong, may mga katawa matag karon ug unya kay tawgon man ni Evelyn si Buddy sa pagseguro nga naminaw kini sa iyang gisulti.
Gipatokar usab sa banda sa party ang mga awit sa mga dekada 70 ug 80 ug nibalik pagsayaw ang Knapsax diin gidapit usab pagsayaw ang tanan lakip na si Vina.
Maayong pagkahan-ay ang programa sa tigpaila nga si Erwin Lim.
Bisan hinayhinay nga nibiya ang ubang mga bisita, padayon sa pagkanta sila si Lloyd ug Keempee sinaksihan sa mga bisita nga nagpabilin.
Alegre ug halandumon ang ika-75 nga birthday ni Buddy. (Roger Serna)