ADUNA koy nadawat nga reklamo gikan sa mga asawa sa mga piniriso sa Cebu City Jail kabahin sa mga polisiya sa mga nagdumala sa maong bilangguan.
Maayong adlaw Sir Bobby,
‘Una sa tanan mohangyo intawon ko nimo sa pagtago sa akong identity. Regarding kini sa pamaagi sa Cebu City Jail. Sa panahon sa tingdalaw grabe kahigpit ang ilang mga pamaagi. Tuod man amo kining gituman bisan sa mga sudlanan sa mga pagkaon daghan bawal. Pero amo gihapon nang gituman maski klase sa pagkaon nga bawal amo nang gilikayan nga dalhon. Gamay kaayo nga sipyat ila dayon i-ban og pipila ka buwan dili na makadalaw.’
‘Naay babaye nga BJMP personnel nga puwerting malditaha. Grabe kaayo ka estrikta bisan senior citizen yanohon lang og kasaba. Niadtong Sinulog nag-open house sila. Ang mga asawa daghan kaayong mibisita apan igo lang sa bagolbol ug walay mahimo kay kon motubag i-ban man dayon.
‘Sa ilang kahigpit, ang mga anak sa mga piniriso nga nagsige og balik-balik na og bisita apan niadtong adlawa kalit lang nilang gipangitaan og birth certificate. Wala man makahibawo ang uban nga mga inahan maong wala makadala. Wala gyuy consideration kay wala gyud pasudla ang mga bata. Nanghilak intawn ang mga bata kay gustong makita ug magakos ang ilang mga amahan nga priso. Nanghangyo ang mga inahan apan gipangsingkahan lang ug gipagawas.’
‘Ang asawa nga gamay rag bitbit pagkaon giingnan nga ‘mao ra ba ni imo ipakaon sa imong bana? Pero ang nakahatag og dakong problema sa pamilya kadtong mga dalaw nga dili gyud mga asawa. Mga dalaw nga bag-o lang nangadto ug gipaangkon nga asawa adtong mga walay dalaw masukad. Kadtong mga bayhana mga babaye nga bayranan. Adto mangwarta sa sulod sa prisohan. Lain ang pangan ilang isulti nga maoy dalawon pero inig abot sa sulod adto diay sa mga bana nga naay mga kaya sa sulod. Mao nga daghan magbugno inig gawas or bisan sa sulod kay maabtan sa asawa. Sa ka higpit nila interview sa mga asawa og tinuod ba nga sila ang gika-live in sa priso gamayng sipyat wa gyud silay kaluoy dili gyud tugutan nga makasulod. Tabangi mi, Sir Bobby, nga masumpo kini.
(O atensiyon taga BJMP).