NAKAPANGHUPAW og lawom ang mga Sugboanon human masayod nga negatibo diay sa Wuhan novel coronavirus ang 5 anyos nga batang lalake nga naospital sa Dakbayan sa Sugbo. Nagpasabot nga ang Pilipinas, partikular na ang Sugbo, libre pa gikan sa novel coronavirus.
Sa labing uwahing taho gikan sa China, 900 kapin na ang nataptan, 41 ang nangamatay.
Dunay pipila nga nangabalaka human gikompirmar sa Department of Health (DOH) nga ilang gi-monitor ang kaso sa bata nga naospital dinhi. Ang bata kuyog sa iyang inahan nianhi dinhi sa Sugbo apan ang bata gihilantan ug nipakita og mga simtomas nga susama og nataptan og coronavirus.
Daghang matang sa coronavirus ug di kini estranyo alang sa mga Sugboanon ug mga Pinoy sa kinatibuk-an. Kanang sip-unon ka, mao ning kagawa ang usa sa mga hinungdan.
Apan ang gikahadlukan karon mao ang novel coronavirus sa Wuhan kay bag-o kini nga strain. Karon, makapangutana kita: maayo bang gibutyag og sayo sa DOH ang kabahin sa kaso sa 5-anyos? Maayo bang gitaho kini dayon sa media?
Mas maayo nga sayo pa lang, nasayod na ang media ug publiko kabahin sa kaso. Ang tumong sa media sa pagtaho di aron hadlukon ang publiko, kon di aron masayod ug makapanagana samtang sayo pa.
Sa China, gitago kaniadto ang paspas nga pagkuyanap sa severe respiratory syndrome (SARS) sa 2002 ug 2003 nga paspas nga nitakod sa 8,000 kapin ka mga tawo ug ningpatay og 700 kapin. Kon wa pa tabon-taboni sa kagamhanan sa mao nga nasod ang kasayuran sa mao nga sakit, di unta kini yanong mokuyanap sa ubang mga dapit sa kalibutan.
Ang mao nga nasod nakat-on na.
Ang Pilipinas makat-on usab unta nga ang sayong kasayuran, tinuod man o di pa,mas maayo aron makapanagana. Di ba ang pagpanagana ug panagang mas maayo kay sa tambal? Busa, mas makaayo ang sayo nga pagbalita.