KAPIN P1 million nga balor sa illegal drugs ang nasakmit sa mga sakop sa Drug Enforcement Unit sa San Nicolas Police Station pasado ala una sa kadlawon sa Biyernes, Enero 24, 2020.
Si Police Major Kenneth Paul Albotra, hepe sa San Nicolas Police Station, nangu sa buy-bust nga miresulta sa pagkasikop sa usa ka make-up artist ug kauban.
Giila ni Albotra ang mga suspek nga sila si Philipp Christian Mendoza, alyas Paloma, 22, taga Barangay Mambaling, Siyudad sa Sugbo, kinsa maoy target ug si Romar Bangcal, 18, taga Sityo Naba sa samang barangay.
Si Mendoza, make-up artist, nasakmitan og bulto nga shabu nga may gibug-atong 155 gramos nga dunay Dangerous Drugs Board (DDB) value nga P1 million samtang si Bangcal nakuhaan usab og usa ka medium sized nga putos sa gituohang shabu.
Si Mendoza niangkon nga ikatulo na niini nga higayon nga naghatud siya sa kontrabando.
Kada deliver, duna siyay suhol nga P3,000 nga alang niya dako nang tabang sa iyang pamilya kay di igo ang iyang kita isip make up artist. (BBT)