HABALHABAL driver nga ex-convict gipusil patay samtang ni attend og disco sa alas 3 sa Sabado sa kaadlawon sa bukirang lugar sa Brgy. Ablayan, lungsod sa Dalaguete, Sugbo.
Si Oliver Getamondoc, 42, biyudo, habalhabal driver ug ex-convict, taga Brgy. Dumalan Dalaguete, dead on arrival sa tambalanan human nakaangkon og samad pinusilan sa tuong buko-buko ug tuong ilok.
Wa madakpi ang suspek nga giilang si Insiong Entera, mag uuma, taga Brgy. Babayongan.
Si Major Jomar Medel, hepe sa Dalaguete Police station nga nahinabi sa Superbalita Cebu, niingon nga si Getamondoc ni-disco atol sa kapistahan
Padung na mopauli si Getamondoc sakay sa iyang motorsiklo dihang niabot si Entera ug nipusil sa biktima.
Ang kapulisan nakakuhag lima ka mga kabhang sa bala sa crime scene.
Matod ni Medel nga panagbangi ang motibo.
EX-CON GIPATAY
Wa pay tino nga motibong maestablisar ang kapulisan sa pagpatay sa usa ka ex-convict niadtong Huwebes pasado alas 8 sa gabii sa Sityo San Roque, Barangay Lamac, Consolacion.
Matod sa kapulisan, posibleng tungod sa iyang pagka tulisan ug duna siyay gikabangi.
Si Police Major Verniño Noserale, hepe sa Consolacion Police Station, sa pakighinabi sa Superbalita Cebu, miila sa biktimang si Ryan Repollo Senas, 30, taga Barangay Lamac.
Gihulagway sa kapulisan si Senas nga banggiitang tulisan.
Dugang pa ni Noserale nga sa inisyal nga imbestigasyon, si Senas nagluto og panihapon sa sulod sa kusina sa iyang pinuy-anan sa Barangay Lamac.
Giingong lima ka armado nga mga tawo ningsulod sa balay ni Senas ug gipusil siya sa makadaghang mga higayon.
Natusak sa mga bala si Senas ug patay nang naabtan sa medical team.
BODYGUARD
Tanghaga pa usab sa kapulisan sa Dakbayan sa Mandaue ang pagpusil patay sa usa ka kanhi sundawo niadtong Huwebes sa hapon.
Ang pamilya sa biktimang si Roger Capoyan-Moneva, 61, wa nahibaw-ang duna siyay gikaaway.
Si Moneva nga mag-adtoan og casino, kanhi sakop sa Philippine Army.
Sila si Moneva ug Joel Alin Capoy nag-angkasay sa motorsiklo dihang sila gipamusil sa may F. Zuellig st., North Reclamation Area, .
Kusog nga nagpadagan si Capoy dihang nakabantay siyang nitakilid ang motorsiklo kay naigo na diay ang iyang uyoan nga iyang angkas.
Nalabay sila gikan sa motorsiklo. Gipangutana pa siya sa iyang uyoan kon naigo ba siya una pa kini natumba.
Pag-abot sa Emergency Rescue Unit Foundation (ERUF), wa na matabang pa si Moneva, namatay kini sa samad sa walang kilid sa lawas ug walang bukton. Si Moneva nagsilbeng freelance bodyguard ug mag-adtoan sa mga casino. (GPL, KFD & BBT)