NABILANGGO ang usa ka giingong commercial sex worker human siya gireklamo sa usa ka lalake sa Waterfront Police Station nga iyang gibugno kay wa sila magkasinabot sa ilang pagtagay unta sa lawasnon nga kalipay sa usa ka lodging house sa dalan V. Gullas, Barangay Santo Niño, Siyudad sa Sugbo.
Gipasanginlan ang babaye nga nidagan sa P500 sa lalake bisan wa pa sila mag-sex.
Si Bordz (di tinuod niyang ngan), 23, taga Barangay Tipolo, Siyudad sa Mandaue, nakigsabot kang Linda (di tinuod nga ngan), alang sa lawasnong kalipay bugti sa P500 pasado alas 5 sa kaadlawon sa Sabado, Enero 25.
Dihang didto na sila sa sulod sa kwarto sa lodging house, gipa money down una si Bordz ni Linda. Gitunol ni Bordz kang Linda ang P500.
Apan sa dihang nakuha na ang kwarta, nikalit lag gawas ang babaye.
Maayo gani kay wa pa makahubo sa iyang sapot si Bordz, dali niyang gigukod si Linda nga nagdala na sa iyang P500.
Sa dihang bawion na unta ni Bordz ang kwarta, gibugno na hinuon siya hinungdan nga nasamad ang iyang mga kamot ug bukton tungod sa mga kawras.
Kasong slight physical injuries ang atubangon nga kaso ni Linda, kinsa nabalhog na karon sa selda sa Waterfront police station.
Ang kaso ipasaka sa Lunes kon desidido si Bordz sa pagkiha kang Linda tungod sa gibuhat niini kaniya. (BBT, AYB)