GIHULAGWAY sa hepe sa Carbon Police Station, Police Capt. Alvin Llamedo nga sakop sa organisadong grupo ang duha ka mga tulisan nga ilang nadakpan niadtong Huwebes sa hapon sa dan Escaño, Barangay Ermita, Dakbayan sa Sugbo.
Sila si Jhan Rymar Villa 25,ug Jose Cabigas Jr., 49, temporaryong nagpuyo sa Camella Homes, Barangay Maghaway, Dakbayan sa Talisay, puro mga taga Mindanao. Gibutyag ni Llamedo nga ang lider sa grupo mao ang usa ka Joel Romarate, kinsa nakaeskapo uban sa usa ka Abit.
Dugang ni Llamedo nga sayop ang ilang unang pagtuo nga gipaluyohan og Indian national ang grupo. Sa ilang imbestigasyon, nasuta nga si Romarate gikan sa Ozamis City.
“Actually mao na among unang pagtuo ug gilantaw gyud nga posibleng gipaluyohan ning grupoha sa usa ka Indian nga mosugo kanila pagpanulis sa kaubang mga Indiano. Apan miangkon ning duha nga gikan sa Ozamiz ang ilang amo,”matod ni Llamedo.
Dugang ni Llamedo nga miangkon ang duha nga ang ilang taguanan naa sa Dakbayan sa Talisay ug San Fernando.
Naa usab silay mga balay nga tagoanan sa lungsod sa Consolacion ug Cordova.
“Kaning sa Cordova ug Consolacion ato pa ning i-verify kay wala pa mi katuod gyud. Nakig-alayon pa ta sa atong mga kauban nga pulis didto. Pero kining sa Talisay ug San Fernando ato na ning mga natultolan,” butyag ni Llamedo.
Nagtuo sila nga mominos na ang mga pagtulis sa Indian national sa pagkasikop sa duha ka mga sakop sa grupo.
“Kining grupoha mao ni ang mga nangigo sa mga Indian national sa Metro Cebu, kadtong mga gipangtulis nila,” matod ni Llamedo. Ugmang adlawa, Enero 27, pasakaan na og kasong robbery ang duha, apil na sila si Romarate ug Abit. (BBT)