SUPERBALITA CEBU

Unang triple-d ni Kawhi

GIPAKGANG: Padulong na nga mohansak sa bola si Kawhi Leonard (no.2), sa Los Angeles Clippers niining aktoha samtang misuway pagpakgang kaniya si Jimmy Butler sa Miami Heat atol sa ilang duwa kagahapon. /AP

GIKULIT ni Kawhi Leonard ang iyang unang triple-double performance sa dihang gibuntog sa Los Angeles Clippers ang Miami Heat, 122-117, sa nagpadayon nga season sa National Basketball Association (NBA).

Si Leonard mipuga og 33 puntos ug gikumbinasyonan sa 10 ka rebounds ug 10 ka assists aron pangulohan ang Clippers (32-14) ngadto sa kadaugan human mabiyai og 15 puntos.

Ang iyang ikanapulo nga rebound sa katapusang 3:55 sa third quarter maoy mikompleto sa iyang triple-double performance.

Midugang og 22 puntos si Landry Shamet, 16 usab ang napugnit ni Lou Williams ug 15 gikan kang JaMychal Green.

Ang Clippers miduwa nga wala si Paul George sa ikawalo nga higayon tungod sa iyang angol sa wala nga kiting.

Wala sab hinuon ang duha ka pointguard sa Miami nga sila si Kendrick Nunn ug Goran Dragic tungod sa ilang tagsatagsa ka mga injury nga ilang naangkon sa ilang overtime nga kadaugan batok sa Washington niadtong Miyerkules.

Si Jimmy Butler maoy nangulo sa Heat nga may 20 puntos, apan wa kini makatiwas sa duwa human nga natingkulo kini sa ikaduhang higayon sa maong panagsangka.

“What do you mean, first triple-double? Of his career? Wow,” ni Heat coach Erik Spoelstra pa. “That is a surprise. He’s as complete a player (as there is) in this league.”

Apan alang kang Leonard, dili kini mahimo niya kon dili pa tungod sa iyang mga kauban. “It’s because of y’all,” matod ni Leonard ngadto sa iyang mga kauban. “Y’all made shots. So that’s all a triple-double is.”

Samtang sa laing bahin, gikahibulong ni Spoelstra kon nganong wala madala si Butler sa starters sa Eastern Conference sa umaabot nga NBA All-Star Game karong Pebrero 16, nga unta mas daghan pa man kini og botos nga nakuha kon itandi sa nahimong starting guard nga si Kemba Walker sa Boston Celtics, ug ingon man mas daghan siya og botos gikan sa media ug mga players batok kang Trae Young sa Atlanta Hawks.

“It’s a joke that he’s not,” ni Spoelstra pa. “Hopefully this will change things in the future.”

“I’m so confused by it,” dugang sa Fil-Am coach. “I just think it’s ridiculous that we’re still in these antiquated positions. So who’s to say what position Jimmy is? Does it matter? ... These are such antiquated labels. I feel like we moved on from that years ago.”

Ang pamahayag ni Spoelstra nakakuha og simpatiya gikan ni Clippers coach Doc Rivers kinsa nasurprisa usab kon nganong wala si Butler masulod sa starters sa NBA All-Star Game nga ipahigayon karong Pebrero 16.

“There (are) no positions and that’s the way the game should be played anyway, in my opinion,” ingon ni Rivers. “Fours, 3s, 2s, 1s, we just call them players. We don’t call them guards or forwards anymore. We just put them in spots and the more guys you can get to do multiple things, the better your team is.”

Ang Heat maoy ikaduha sa Eastern Conference standing sunod sa Milwaukee Bucks.

Samtang sa laing duwa, mipabaha og 35 puntos si Devin Booker ug ang Phoenix Suns mipakaging sa host San Antonio Spurs, 103-99.

Ang kadaugan maoy nagputol sa 11 ka sunodsunod nga kapildihan sa Suns diha sa San Antonio.

Mao usab kini ang ikawalong higayon nga si Booker mitali og labing minus 30 puntos sa buwan sa Enero ug ika-17 na sa karon nga season.

Sa 12 ka duwa ning buwana, siya nag-average og 31.3 puntos.

Mirali ang San Antonio sa fourth quarter ug mipahak sa labaw, 94-93, human sa duha ka free throws ni Derrick White sa nahabiling 3:52 segundos apan gitubag ra usab dayon kini sa mga jumpshot ni Booker aron pagbingat og balik sa bintaha.

Si DeMar DeRozan mipaksit og 30 puntos ug walo ka rebounds alang sa Spurs.

Sa ubang mga duwa, gilubong sa Milwaukee Bucks ang Charlotte Hornets, 116-103, gipalyar usab sa Memphis Grizzlies ang Detroit Pistons, 125-112; gibaraw sa Boston Celtics ang Orlando Magic, 109-98; gileksiyon sa Toronto Raptors ang New York Knicks, 118-112.

Gibali-an sa Kings ug sungay ang Bulls, 98-81; ug gipasulbongan sa Houston Rockets ang Minnesota Timberwolves, 131-124.

Giparot usab sa Nuggets ang New Orleans Pelicans, 113-106; ug gipatugpa sa Oklahoma City Thunder ang Atlanta Hawks, 140-111. (JBM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph