TAAL, Batangas -- Nadawat na ang P6 milyones nga tabang pinansyal sa Ormoc City alang sa mga biktima sa pagbuto sa Bulkang Taal.
Si Ormoc City Mayor Richard Gomez ug Kogresista Lucy Torres - Gomez uban ni Vice Mayor Toto Locsin Jr., Konsehal Lalaine Marcos, Goito Yrastorza ug City Administrator Vince Emnas ang mitunol sa cheke.
Ang P6 milyones gibahin sa duha ka lugar, P3 milyones sa lungsod sa Taal sa Batangas ug P3 milyones sa Tagaytay City.
Kapin tulo ka oras ang gibiyahe sa magtiayong Gomez ug kaubanan sa paghatud sa tabang.
Una nga gitunol ang P3 milyones sa Tagaytay diin mismo si Mayor Agnes Tolentino ug bana nga si Kongresista Abraham Tolentino ang midawat niini.
Matod sa mayor nga dako kaayo nga tabang ang gihatag sa Ormoc alang sa pag-recover gikan sa insidente.
Matod ni sa kongresista, nagplano usab sila nga mahimong sister city ang Ormoc.
Sunod nga gibiyahe sa magtiayon nga Gomez ug kaubanan ang lungsod sa Taal.
Gisugat ni Mayor Fulgencio Mercado ug mga opisyal ang grupo ni Gomez dala ang P3 milyones.
Galuha ang mata ni Mercado sa pagdawat sa tabang ug hilabihan ang pasalamat sa magtiayong Gomez ug taga Ormoc.
Gisaad ni Mercado atubangan sa katawhan nga misaksi sa paghatag nga makaabot sa mga tawo ang tabang ug duna'y transparensiya.
Matod ni Gomez, gisuklian lang nila ang tabang nga nadawat sa Ormoc sa dihang ang dakbayan naigo og mga kalamidad.
"Nagpapasalamat ako sa aming Sanggunian dahil mabilis nilang naaprubahan ang tulong. Kami sa Ormoc maraming beses na kami natamaan ng disaster at maraming tumulong. So this is our way of giving back," matod ni Gomez
Napili sab ang Tagaytay gumikan kay kadaghanan sa mga evacuees ang nipasilong sa maong lungsod.
Samtang ang Taal ang duol ug labing apektado sa pagbuto sa bulkan.
Gikan sa alert level 4, gipaubos na sa alert level 3 ang status sa maong bulkan.
Sa miaging tuig, mipaabot usab og tabang ang Ormoc sa mga nabiktima sa linog sa Mindanao. (JKDP)