Genoguin: Visa ni Dela Rosa baylo sa VFA?

DAGHAN nang mga higayon nga giimbitar ang atong Presidente Rodrigo Duterte sa America ubos sa administrasyon ni Presidente Donald Trump, pero kanunay kini niyang gibalibaran, kung unsay mga bug-at nga katarungan siya lamang ang bugtong nahibawo.

Pero, duna kitay gamay nga nahibaw-an nga makatarunganon, nga kung dili ako masayup niadtong bag-o siyang nahibalik sa pagka mayor sa sayong katuigan sa 2000 nga adunay sakop sa Central Intelligence Agency (CIA) nga nakacheck-in sa Evergreen Hotel sa Ramon Magsaysay Street ning atong dakbayan nga mibuto ang usa ka bomba nga iyang dala, ug naunay siya.

Nadala sa Davao Doctors Hospital ang maong tawo, apan wala kini na-imbestigahan sa atong mga otoridad, kay gikawat sa iyang mga kauban mismo sa ospital ug gilayas, butang nga wala nato mahibaw-i kung kinsay gipanid-an sa mga sakop sa CIA dinhi sa atong siyudad sa Davao.

Makatarunganon lang nga ma-alburoto ang atong mayor sa ingon niadtong hitaboa kay gihimo kitang gago sa mga CIA kon unsay ilang misyon dinhi sa atong dakbayan sa Davao, si Mayor Duterte ba kaha, nga natunog niadtong panahona nga suod kaayo sa mga rebeldeng New People’s Army pinangulohan ni Leonardo Pitao alyas Commander Parago.

Ikaduha, kadtong muadto unta siya sa America kay gipakatawo didto si Inday Veronica ang batan-ong anak sa atong mayor niadtong panahona, apan, gibara siya sa American Embassy ug deklara pa siya nga persona-non-grata.

Kining tanan maoy mga background ug makatarunganon para sa atong mayor kung nganong init ang iyang dugo sa America. Kung kamoy pangutan-on makatarunganon ba ang atong mayor? O dili, husgahi daw ninyo.

Hangtud miabot ang panahon nga wala nato damha, tungod kay maoy iyang destinasyon ug kapalaran, nahimo nato siyang presidente sa Pilipinas, dinhi nagpabilin ang iyang kaaligutgot sa America, ilabina kang kanhi presidente Barrack Obama nga unang nanghilabot sa iyang bag-ong administrasyon nga may nangamatay sa kampanya batok ginadili nga droga.

Sa administrasyon ni Trump bisan kung wala pa silay bikil kanunay gihapon gibalibaran sa atong presidente ang imbitasyon ni Trump, ilabi karong bulan sa Marso, ug gituldokan dayon niya nga dili siya muadto.

Pero dinhi kita nahikurat, sa dihang gikansela sa America ang visa ni Senator Ronald “Bato” dela Rosa, sa unsang hinungdan, sayud na kitang tanan, tungod sa daghang nangamatay sa iyang “Tuktok-Hangyo” (Tokhang).

Pero makatarungan kaha, nga ang visa ni dela Rosa ibaylo sa Visiting Forces Agreement (VFA). Bilib ko sa kalakas sa atong senador ngadto sa atong presidente.

Pero dapat isip isip usa ta sa lawom nga linogdangan ini, ang nasud walay pwersa, tuldok lang intawon ta, unya magpatigastigas ta? Murag dili man siguro problema sa America kung ibasura sa Pilipinas ang VFA? Kita ang magproblema kay dako kaayo ang katawa ug kalipay sa China kay wala na’y babag sa ilang tinguha nga angkonon ang Pilipinas diba?

Kung masuko ang America sa Pilipinas dili bala ang ilang gamiton, kun dili economic sanction, patay tang tanan, maayo tingali timbangtimbangon usa nato basig madaut ta, ang hinungdan visa lang ni Dela Rosa...Oh my God!

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph