TULUNAN, North Cotabato -- Patay na nga nakaplagan ang assistant municipal engineer sa lokal nga kagamhanan sa Tulunan alas 3:50 sa hapon Sabado, Enero 25, 2020.
Giila ang biktima nga si Jayson "Eson" Porto.
Sa taho gikan sa kapulisan sa Tulunan Municipal Police Station nga mismo ang pamilya sa biktima ang nakadungog sa buto sa armas sulod sa kuwarto niini.
Abtik kining gisusi sa mga anak sa biktima ug didto ilang nakit-an ang biktima nga naligo na sa kaugalingon niyang dugo.
Patay na si Porto nga dunay igo sa ulo gamit ang .9mm pistol nga maoy gigamit sa pagpusil sa kaugalingon.
Sumala pa nga sa wala pa ang hitabo, ang biktima namatikdan na sa iyang mga kauban sa trabaho nga maora og dunay gisagubang nga dakong problema.
Kapulisan sa Tulunan MPS padayon nga nagsusi sa maong hitabo aron nga masigurong way foul play niini.