LAMBERTO G. CEBALLOS
Cawayan, Dalaguete, Cebu
BIRTHDAY ni Dorothy. Alegre kaayo ang birthday party niya niining gabhiona didto sa Coconut Palm Hotel diin nanambong sa iyang ‘debut’ ang iyang pamilya ug suod nga mga higala sa iyang ginikanan. Didto pod ang pipila ka suod niyang higala. Apan nabatyagan niya nga wala motambong si Papa Danilo niya, kinsa maoy nagkugos kaniya sa bunyag. Suod nga higala sa iyang ginikanan ang iyang maninoy. Disi-utso na siya. Malipayon siya kay hingkod na ang iyang pagka dalaga ug pinangga siya sa iyang Daddy Walter ug Mommy Leah.
Si daddy niya ang unang misayaw kaniya.
“Happy birthday, anak! I love you!” hunghong ni daddy niya samtang nagsayaw silang duha taliwala sa dance floor dinuyogan sa bugnaw nga sonata gikan sa sound system sa hotel.
“I love you, too, Dad! Thank you so much for everything you’ve done to make me what I am now. I love you and Mommy!” tubag ni Dorothy.
Human sa ilang sayaw ni daddy niya, nagpuli-puli pag ‘cut-in’ sa sayaw sa misunod nga sonata ang iyang mga higalang lalake nga mga batan-on. Nahuman ang party nga napuno sa kahimungaya ang dughan ni Dorothy.
Didto sa sala sa ilang panimalay human makailis sa sapot pangkatulog, giablihan ni Dorothy ang mga regalo nga iyang nadawat. Diha sila si Daddy Walter ug Mommy Leah nag-apong nga sayag ang mga nawong. Naablihan na niya ang mga regalo sa iyang ginikanan ug nagpasalamat siya. Nagpadayon siya pagpangabli sa ubang mga regalo. Unya may usa ka regalo nga pula ang wrapper. Iyang gipunit ug gibasa ang tarheta nga nagpilit niini.
“Uy! Duha diay akong gift gikan nimo, Dad?” ni Dorothy nga mitan-aw sa nawong sa iyang Daddy Walter.
Gilabni ni Walter ang regalo gikan sa kamot ni Dorothy ug gibasa ang tarheta: “Happy birthday, Dorothy! From your loving father!” Giablihan ni Walter ang karton ug may ‘note’ pa nga nabasa niya sa sulod nga nag-ingon, “I love you so much and will always support you.” Ang nihatag sa maong regalo mao ang maninoy ni Dorothy, si Danilo. Nanginit ang mga dalunggan ni Walter. Giduso niya ang regalo sa sabakan ni Leah ug mitindog nga nagpangusmo. Nahibulong si Leah. Unya gibasa niya ang ‘note.’ Ug nahinumdom siya nga duha na ka buwan nga gisamkon niya ang liso nga gitisok ni Danilo sa iyang sabakan dihang gikasal sila si Walter. (KATAPUSAN)