ORMOC City, Leyte – Kapin sa usa ka milyon ka mga turista, lokal ug langyaw, ang natala nga ningbisita sa dakbayan sa 2019, labing dako nga ihap sukad niadtong 2016.
Kini ang gitug-an sa mga miyembro sa Ormoc City Tourism Council (OCTC) sa ilang tigom niadtong Enero 24, Biyernes.
Matod sa OCTC, sa 2019 niabot sa 1,335,336 ang grand total sa tourist arrival sa dakbayan.
Laing daghan og natala ang mga Day Tour and Events nga dunay 931,930, nagsunod niini ang mga Accommodation Establishments nga dunay 273,240 ug Tourist Sites Visitation nga dunay 130,166.
Base sa datos sa OCTC, sa paglingkod ni Mayor Richard Gomez niadtong 2016 natala sa Ormoc ang 124,623 nga tourist arrival; sa 2017 naitala ang 297,435 ug niabot sa 348,412 sa 2018.
Lakip sa Day Tour and Events sa dakbayan mao ang Ormoc Museum; Bench Marking Session; Ormoc Port; City Agriculture; MICE/Convention Center; Eviraa 2019; Parade of Lights; Miss Ormoc 2019; Fiesta Culminating concert; Charter Month Culminating concert ug Year-end celebration concert.
Matod ni Gomez, niadto pa niya prayoridad ang turismo ug peace and order sa Ormoc ug ilang buhaton ang tanan aron mas molambo pa kini sa mo sunod pa nga tuig.
Niini, nakuha sa dakbayan ang pasidungog nga Safest City sa Pilipinas ug nakuha usab ang Best Tourism Research Award.
Ang turismo sa Ormoc padayong gipalambo karon. (B)