Nadela: Babaye nga drayber sa habalhabal

SA NATAD sa panginabuhi, ang mahimo sa mga lalake, gihimo na sab sa mga babaye karon. Nasayod ka ba nga ang imong gihangad nga crane nga gitungtung sa ibabaw nga bahin sa gitrabaho nga building, dunay uban niana mga babaye ang operator? Sama sa trabaho sa pagka welder ilabi na didto sa buhatanan og barko, daghang welder nga mga babaye.

Gani ang uban nila tua na mag-welding sa gawas sa nasod. Kon maghisgut ta og trabaho sa pagka driver, niadtong dekada 90 na-interview nako ang labing unang babaye dinhi sa Sugbo nga nagdrayb og jeepney. Nagruta kini og Colon-Urgello. Diha sab toy akong na-interview nga mga babaye nga nagdrayb og school service ingon man trisikad ug tricycle. Apan sa miaging semana, sa labing unang higayon nakahinagbo ko og babayeng driver og habalhabal. Tungod kay nagdali ko wa ko kabantay nga ang akong gipara nga habal habal ang driver babaye diay. Siya mao si Susana Bongga, 53 anyos ug molupyo sa Purok 2, Villa San Jose, Talamban, Cebu City. Nipara ko niya sa may Osmeña Blvd., Cebu City. Paghunong, nagtuo ko nga lalake kay mao may naandan ning maong matang sa panginabuhi. Tungod kay nag-helmet pun-an pa sa sap-ong sa iyang baba ug shades, di gyud mailhan nga si Susana ang namasahero. Apan sa dihang nangutana siya kon asa ko padulong, dinhi nako makabantay nga babaye ang driver sa habalhabal.

Sa sinugdanan nagduhaduha ko kay babaye baya ang nagtimon. Ako siyang giusban og pangutana kon tinuod ba nga siya namasahero. Iyang tubag mag-unom na ka buwan siyang namasahero. Mao to nga niangkas ko padung sa akong tuyo. Hanas kaayo si Susana momaneho. Defensive driver ang akong paghulagway sa iyang drinayban mao nga layo sa peligro. Sa laktod, suheto siya sa balaod sa trapiko. Iyang giasoy nako ang hinungdan nganong nahimo siya nga habalhabal driver.

Niadtong 1993, napadpad siya dinhi sa Sugbo gikan sa ilaha sa Calamba, Misamis Occidental ug nanarbaho isip katabang. Paglabay sa napulo ka tuig, gamit ang tinigom niundang siya pagka maid aron magnegosyo. Naninda siya og banana cue sa may Englis V. Rama. Nakapalit og motor nga maoy iyang gigamit pagpangumpra og saging.

Apan sa miaging tuig, gidemolis ang iyang puwesto nga mao ra sab ang iyang pinuy-anan. Nibalhin siya og puyo sa Talamban ug dinhi nakahukom siya nga gamiton nalang ang motor sa pagpamasahero. Alang niya usa ka dakong hagit ang pagpamasahero labi na kay usa man siya ka babaye. Daghang higayon nga lalake ang iyang pasahero ug iya nalang gitugyan sa Ginoo ang tanan taliwala sa kabalaka basin makapasahero siya og may dautang tuyo. Sa pangedaron nga 53 anyos, wa pa gyud siya makapag og ikauban sa iyang kinabuhi. Ako siyang gikomedyahan kinsay nasayod nga ang tawo nga mopapitik sa iyang kasing kasing naa ra sa iyang likod, nag-angkas padung sa iyang destinasyon. Igo ra siyang. niagik-ik og katawa dayong panamilit kay may suki pa siya nga magpakuha. Sa sitwasyon ni Susana nakaingon ko nindot siya nga panag-ingnan sa uban. Pulong pa sa duha ka parking aide nga sila si Felsara Villarino ug Lourdes Gomez , ang kababayen-an karon dako na kaayo og kausaban itandi sa nangaging mga panahon.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph