DALAYGON ang pagpakabana ni Cebu City Mayor Edgardo Labella sa kaluwasan sa panglawas. Apan dili maayo ang iyang pagratsang pulong sa pag-ban sa mga Insek sa pagsulod sa dakbayan, matod niya, kon ang ilang presensiya risgo sa panglawas sa mga Sugbuanon tungod sa 2019 nobel coronavirus.
Ang pagluwat og ratsada o heneral kaayong pulong dili makiangayon sa mga Insek. Dili usab makitawhanon. Unsa ka kaha kon kita ang nabutang sa ingon nga sitwasyon, malipay pa kita nga likayan bisan wala kita magkasakit?
Karon na hinuon nga hingpit nang nasuta sa laboratoryo sa Australia nga negatibo sa naasoy nga virus ang samples sa 5-anyos nga batang lalake nga na-quarantine dihang niabot sa Sugbo gikan sa Wuhan, dapit sa China diin nakaplagan ang bag-ong strain sa coronavirus.
Dugang pa, ang China nga nihimo na usab sa ilang paspas nga lakang sa pagsanta sa pagkatap sa virus. Sumala sa usa ka taho sa online news kagahapon, Enero 26, dunay 13 ka mga siyudad ang ‘gi-lock-up’ lakip sa pagsuspenso sa turismo sa Great Wall of China ug Disneyland sa Shanghai. Dili mominos 40 milyunes ka mga tawo ang ‘napriso’ o dili na makagawas ug wa usay makasud sa gisirad-an nga mga dapit.
Apan sa kadako sa China, daghan pang ubang Insek nga luwas sa naasoy nga virus gikan sa wala sirad-i nga dapit, babagan ba nato sila sa pagsulod sa Sugbo? Dakong epekto sa ekonomiya. Dili makiangayon ang ratsadang pamahayag human makapasakit sa pagbati sa uban ug makatandog sa garbo sa ilang lokal nga kagamhanan. Basin kita hinuon ang boykotan? Ang mga Insek nag-unang bisita karon sa dakbayan.
Ang mga turista, Insek o dili, dako og natabang sa pagtuyok sa lokal nga ekonomiya. Prino-prino ta sa paggamit sa pulong nga ‘ban’ labi na sa mga Insek nga kasosyo nato sa kalamboan bisan niadtong wala pa ang kolonyalistang Espanyol ug Amerikano.