PADAYONG nagdugkat og kahayag ang Cebu-Casino Ethyl Alcohol sa mga dalan paingon sa playoffs pinaagi sa pagmakmak sa Imus, 101-76, sa 2019-20 Chooks-to-Go MPBL Lakan Season niadtong Sabado sa gabii, Enero 25, 2020, sa Alonte Sports Arena.
Ang Sharks mingsaka sa 13-13 nga rekord ug padayon kining sikit nga nagsunod sa Bicol-LCC Stores (15-13) sa inilugay sa ikawalo ug katapusang luna sa Southern Conference.
Ang kanhi magduduwa sa University of the Visayas (UV) Green Lancers nga si Rhaffy Octobre mao na sab ang nangulo sa Sharks pinaagi sa iyang double-double nga 19 puntos ug 10 rebounds.
Ang manugsulod na sa Philippine Basketball Association (PBA) nga si Will McAloney lakip na sila si Kraniel Viloria ug John Ubalde nagkumboya og 21 puntos alang sa Sharks.
“Ang mindset kasi namin dito, defense talaga. Last four practices namin, nakukuha na nila yung lahat ng gusto kong mangyari, I hope mag tuloy tuloy hanggang makaabot sa playoffs,” matod ni Cebu coach Noynoy Falcasantos sa interbyu sa Sun.Star Cebu, igsuong buhatan ning mantalaan.
Gikan sa walo lang ka mga puntos nga labaw human sa 1st quarter, ang Sharks padayong ningpahugot sa ilang depensa nga nagpasutoy sa ilang opensa aron paburoton og dako ang labaw.
Ang Imus, nga nanamilit na ug ninghuman sa ilang kampanya dala ang 6-24 nga rekord, gipangulohan ni RJ Deles pinaagi sa iyang 12 puntos, nihatag og 11 puntos si Jojo Cunanan samtang niamot og 10 puntos ang artistang si Gerald Anderson.
Puntos matag usa
Cebu (101) - Octobre 19, McAloney 13, Lee Yu 13, Viloria 11, Ubalde 10, Galvez 8, Lao 8, Cortes 8, Huang 4, Cenita 3, Nuñez 2, Ilad 2 Imus (76) - Deles 12, Cunanan 11, Anderson 10, Ng Sang 10, Nacpil 9, Munsayac 6, Caceres 4, Gonzaga 3, Ong 3, Morales 3, Vito 2, Dedicatoria 2, Cawaling 1. (JNP, ESL)