NAGBUNGA ang regular nga training ni Michael Largo sa kabukiran dihang nakaangkon siya og kampiyunato sa Horizon 101 Cebu Vertical Run niadtong Sabado sa gabii, Enero 25, 2020, sa Horizon 101 towers sa General Maxilom Avenue, dakbayan sa Sugbo.
Gisaka ug kanaog ni Largo ang 101 floors (55 sa Tower 1 ug 46 sa Tower 2) sulod lang sa 20 ka mga minutos ug 22 ka mga segundos nga naghatag kaniya sa titulo sa men’s Full Challenge catergory ug P20,000 nga ganti.
Ang 39 anyos nga si Largo midominar sa relay event ning maong lumba sa miaging duha ka mga tuig una kini nakadesisyon nga mosuway sa individual Full Challenge.
Bisan nagkampanya siya sa laing kategoriya, mao ra gihapon ang resulta alang kang Largo.
Gilupig niya ang 2nd placer nga si Kenyan Joseph Mururi og kapin sa usa ka minutos. Ang miangkon sa ikatulong puwesto mao si Ejay Glamadona (22:09).
Sa interbyu sa Sun.Star Cebu, igsuong buhatan ning mantalaan, nagkanayon si Largo nga wala’y puas ang iyang training sa bukirang bahin sa lungsod sa Aloguinsan ug alang kaniya, mao kini ang iyang bintaha ning maong lumba.
Ang laing Kenyan nga runner nga si Cherotich Consolata maoy midaog sa women’s individual Full Challenge pinaagi sa oras nga 23:35. Nagsunod kang Consolata mao si Ruffa Sorongon (24:49) unya ikatulo si Cherry Andrin (27:45).
Sa laing bahin, si Florendo Lapiz maoy midaog sa men’s Half Climb (Tower 1) pinaagi sa oras nga 12:57, ikaduha si Ariel Saballa (13:10) ug ikatulo si Joland Olmilla (13:12).
Sa women’s Half Climb, nipatigbabaw ang 13 anyos nga si Asia Paraase (16:47), ikaduha si Melody Perez (17:47) ug ikatulo si Charisse Encarnacion (18:15). (RSC, ESL)