NASUGAMAK sa kapildihan ang Los Angeles Lakers batok sa hosts Philadelphia 76ers, 91-108, apan wala kini nakatay-og sa dakong atensyon nga nakuha ni LeBron James human niya nailugan sa ikatulong dapit ang iyang idolo nga si Kobe Bryant sa all-time scoring list sa National Basketball Association (NBA) kagahapon.
Ang 35 anyos nga si James nisulod sa korte nga nagkinahanglan na lang og 18 puntos aron iyang malabwan si Bryant ning prestihiyusong listahan.
Nanindog ang mga tumatan-aw nga naggamit sa camera sa ilang cellphones aron sa pamasin nga makabaton og handumanan sa tipik sa kasaysayan pinaagi sa pagkuha og hulagway sa pagmugna ni James sa iyang ika-18 puntos.
Nahitabo kini sa nahabiling 7:23 minutos sa 3rd quarter dihang nakapuntos ang four-time MVP pinaagi sa layup nga naghatag kaniya og kinatibuk-ang 33,644 puntos. Igo lang kining milabaw og usa ka puntos sa nabawon ni Bryant sa iyang pagretiro nga 33,643 puntos.
Pagkahuman sa duwa, si James nakahimo og 29 puntos nga nag-inat sa iyang kinatibuk-ang tinigom ngadto sa 33,655 puntos.
“Continuing to move the game forward @KingJames. Much respect my brother #33644,” tweet ni Bryant kabahin sa naabot ni James.
Nag-standing ovation ang mga sumosunod sa 76ers dihang gihunong kadiyot ang duwa aron opisyal nga ianunsyo ang naabot ni James.
Nagduwa man tuod si James sa kontra nga puwersa apan grabe gihapon ang paghangop sa mga sumosunod sa 76ers gumikan kay natawo man kini sa Philadelphia.
Ang 76ers nag-post og graphic sa listahan sa top 10 all-time scoring leaders sa NBA diin ang nakapuwesto sa top 4 pulos nakaduwa sa Lakers.
Nag-una sa listahan mao si Kareem Abdul-Jabbar (38,387) unya ikaduha si Karl Malone (36,928).
Nalantawan nga si James na ang mag-una ning maong listahan kon padayon kining magduwa sa magsunod nga tulo ka seasons.
Usa pa ka teenager si James dihang una niyang gikahimamat si Bryant sa usa ka youth basketball camp diin ang gitawag nga Black Mamba maoy speaker.
Seryusong naminaw si James sa mga tambag ni Bryant niadtong higayuna, tanan gitanom niya sa iyang dughan ug nagsilbi kini niyang gabayan sa iyang basketball career.
“I was just listening,” matod ni James. “I was just trying to soak everything up I could. I remember one thing he said was that if you want to try and be great at it, and want to be one of the greats, you’ve got to put the work in.”
Sama kang Bryant, si James miambak gikan sa high school ug miduwa na kini’g diretso sa NBA wala na moagi sa kolehiyo ug sama ni Bryant, nakahakot na sab siya og mga pasidungog ug mga kampiyunato. (AP, ESL)