DUNAY 15 ka bank accounts ang giandam na sa kagamhanan sa lalawigan sa Sugbo nga madepositohan sa power producers sa Sugbo ngadto sa Kapitolyo aron i-remit niini ang bahin sa kita sa kuryente.
Mao kini ang gipahibawo ni Provincial Treasurer Atty. Roy Salubre, pinaagi sa Sugbo News, ang news portal sa Kapitolyo.
Matod ni Salubre, kapin sa 20 unya ka accounts ang ilang ablihan kon asa makadeposito ang power producers sa bahin sa Kapitolyo gikan sa income niini.
“Ang uban open na so more than 20% very open, ready na ang account anytime kay kada plant man diay siya,” matod ni Salubre.
Sa balaod nga gilatid sa bag-ong energy law, kinahanglan moabli og tag duha ka mga trust funds ang Kapitolyo.
Gisaysay usab niini nga gikinahanglan nga mohatag ang power producers og income sa lokal nga kagamhanan kon asa kini nag-operate.
Ang maong bahin gamiton alang sa Development and Livelihood Fund (DLF) ug alang sa Reforestation, Watershed Management, Health and Environment Enhancement Fund.
Gihimong basehan mao ang Department of Energy (DOE) circular 2018-08-0021 nga giluwatan ni Energy Secretary Alfonso Cusi sa 2018.
Makita kini sa Section 5 (i) sa Republic Act 7638 (Department of Energy Act of 1992).
“Devise ways and means of giving direct benefits to the province, city, or municipality, especially the community and people," dason ni Salubre. (ANV)