Tupad beneficiaries gihatagan og suweldo

HINGPIT nang nakadawat ang 2,000 ka mga benepisyaryo sa Tulong Panghanapbuhay sa Ating Disadvantaged/Displaced (Tupad) workers sa dakbayan sa Lapu-Lapu ubos sa programa sa Department of Labor and Employment (Dole) 7 ug buhatan ni Kongresista Paz Radaza sa lone district sa dakbayan sa Lapu-Lapu.

Ang naasoyng programa usa ka community based nga tabang sa mga nawad-an ug wala nay trabaho diin tagaan sila og labing minos 10 ngadto sa 30 ka adlaw sa pagtrabaho sa ilang barangay.

Sa dakbayan sa Lapu-Lapu, ang tibuok 30 ka barangay pulos adunay benepisyaryo sa Tupad program.

Sa kinatibuk-ang 5,000 ka mga benepisyaryo nga nakatrabaho sulod sa lima ka batches, moabot sa 2,000 na ang nakadawat sa ilang 10 ka adlaw nga sweldo sa milabayng Martes, Enero 21.

Ang maong mga nakadawat mao ang 1st, 2nd ug 3rd nga batch sa nakatrabaho.

Nadawat ang sweldo sa mga benepisyaryo pinaagi sa money remittance nga mao ang mechanics ug service fee cost nga gisunod sa tibuok rehiyon.

“Ang budget ani gikan sa national, diretso gyud na sa panudlanan sa DOLE, dili na moagi pa diri namo, which is mao ang nakanindot ani nga programa. Ang beneficiary na mismo ang mokuha ana didto sa remittance center kay makadawat mana sila og text ana,” matod ni Radaza

Giawhag usab sa kongresista ang mga kapitan sa Barangay sa pagmonitor sa ilang mga benepisyaryo sa pagtutok sa mga social community project sama sa debris-clearing, pag-ayo sa pampublikong pasilidad, street cleaning ug pagpanindot sa barangay nga ilang gialagaran.

Pinaagi niini, aduna gihapoy kitaon ang mga benepisyaryo sa Tupad program nga gikatakdang magdawatan sa minimum nga suholan.

“Ato gyud ni gipa-monitor sa Kapitan kay sila may mas nakaila sa ilang mga tawo nga gipasulod unya mas maayo gyud nga dunay monitoring aron makita gyud ang ilang gitrabaho kay minimum baya ni ilang sweldo. Malipayon ko nga nakadawat na gyud sila sa ilang sweldo bisan na delayed gamay tungod sa kakulian. Dako na gyud ni og tabang para kanila," pagpasabot ni Radaza.

Ang buhatan sa kongresista padayong manawat og benepisyaryo apan wala nay labot ang nakatrabaho sa una. (GCM)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph