GIKATAKDA nga motahan sa kaugalingon ang lalakeng tinun-an sa siyudad sa Lapu-Lapu ngadto sa Land Transportation Office (LTO) 7, kinsa giingong nigamit og siren para dili ma-late sa iyang eksaminasyon, karong buntag.
Kini ang gibutyag ni LTO 7 Director Victor Emmanuel Caindec, kinsa niingon nga alas 9:30 karong buntag, Enero 27 gipabot niya ang maong tinun-an sa ilang buhatan diha sa LTO 7 sa N. Bacalso Avenue, dakbayan sa Sugbo alang sa dugang imbestigasyon.
Apan si Caindec niingon nga dili na importante ang pag-ila kon si kinsa ang nag-upload sa maong video kinsa giingong nakuha niadtong Enero 23 didto sa dakbayan sa Lapu-Lapu bisan paman sa taho nga gikan ang maong video sa anak ni Mayor Junard Chan pinaagi sa iyang Instagram account nga “jasminekingchan.”
Sa pag-viral sa post nga gi-share sa gatusan ka mga Facebook acount ug mga Facebook page sa mga media outlet sa Sugbo gidasig na kini sa pangulo sa LTO nga motahan sa iyang kaugalingon. (PAC)