P4.2 M shabu nasakmit sa Lapu

MGA EBIDENSIYA: Si Mayor Junard Chan (wala) nitan-aw sa mga ebidensiya nga nasakmit gikan sa usa ka babaye (tuo) nga gidilin nga druga nga mobalor tanan og P4.2 milyunes. (Gikan sa PDEA 7)
MGA EBIDENSIYA: Si Mayor Junard Chan (wala) nitan-aw sa mga ebidensiya nga nasakmit gikan sa usa ka babaye (tuo) nga gidilin nga druga nga mobalor tanan og P4.2 milyunes. (Gikan sa PDEA 7)

USA ka babaye nga gihulagway isip high value individual sa Lapu-Lapu City Police Office ang nasikop niadtong Dominggo, Enero 26, diin nakuhaan usab kini og kapin P4 milyones nga kantidad sa shabu.

Ang nasikop naila nga si Ceilo Mendoza Regner, 33, kinsa residente sa General Maxilom Avenue, Cogon Ramos, dakbayan sa Sugbo.

Gihimo ang buy bust operation niadtong Dominggo sa alas 2:15 sa hapon sa Sitio So-ong 2, Barangay Mactan, siyudad sa Lapu-Lapu.

Ang sakop sa City Intelligence Branch sa LLCPO mao ang nangulo sa pagdakop kang Regner. Nakuhaan kini og 21 ka pakete sa shabu diin aduna kini’y gibug-aton nga 625 ka gramos nga nagkantidad og P4.2 milyon base na usab sa Dangerous Drugs Board (DDB) value.

Nakuhaan usa kini sa duha ka P500 nga gigamit isip buy bust money ug P1,560 nga gituohang halin sa iyahang ilegal nga negosyo.

Usa si Lapu-Lapu City Mayor Junard “Ahong” Chan nga nisaksi sa maong buy bust.

“Padayon ang atong suporta ngadto sa atong talahurong President Rodrigo Duterte kontra druga kay sayod ako nga kini ang nagguba sa kaugmaon sa atong mga kaigsuonan, labaw na sa kabataan,” si Chan nagkanayon.

Sa laing bahin, nikabat og 25 ka gramo nga shabu nga nagkantidad og P171,200 base sa DDB value ang nasakmit usab niadtong Enero 25, sa Purok Tambis, Barangay Umapad, dakbayan sa Mandaue.

Ang suspek nga nasikop mao sila si Noel Tagpuno, 31, ug Peter Paul Esperanza, hamtong, pulos nagpuyo sa Barangay Lorega, siyudad sa Sugbo.

Matod ni Police Major Aldrin Villacampa, hepe sa Mandaue City Police Station 5 nga nadakpan ang duha pinaagi sa buy bust sa PDEA 7.

Nakuha sa mga suspek ang tulo ka mga gagmay ug duha ka dagkong pakite sa gituohang shabu.

Mag-atubang og kaso sa kalapasan sa Section 5 ug 11 ang maong mga suspetsado anaa na sa kustodiya sa kapolisan. (Dugang ni JCT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph