SUPERBALITA CEBU

Kapuyo, balay gisunog

TUNGOD sa tumang pangabubho, lalake nakaako sa pagsunog sa iyang kapuyo sa Barangay Liburon, dakbayan sa Carcar kagahapon, Dominggo, Enero 26, alas 11:00 sa buntag.

Samtang, ang duha ka buwan nga masuso naluwas sa mga tawo gikan sa balay nga nagkayo.

Si PCpl. Alge Noel Espinosa sa Carcar City Police Station (CCPS) nibutyag sa Superbalita Cebu nga pasado alas 12:00 sa udto na nila madawat ang alarma pinaagi sa tawag sa telepono gikan sa usa ka nagpakabanang molupyo sa dapit.

Lakip sa niresponde mao ang bombero sa dakbayan diin ang CarCar City Fire Station nakadawat sa susamang alarma sa alas 11:16 sa buntag sa samang adlaw.

Ug paglabay sa 25 minutos, gideklara nga nga fire out na ang maong sunog sa balay nga naugdaw nga gipanag-iya ni Romnick Melecio, hamtong na, ug lumad nga taga Bohol.

Ang kayo wala makakatap sa ubang kabalayan human nakontrolar dayon sa kabomberohan.

Nakurat ang mga imbestigador dihang pagsusi sa naugdaw nga balay, nakita nila ang lawas sa napaig nga babaye, kinsa giila nga si Dailyn, 24, taga Negros Oriental ug kapuyo ni Romnick.

Gibanabana nga P75 mil ang danyos sa sunog.

Sumala sa mga imbestigador sa Carcar, ang kayo didto nagsugod sa lawak ni Romnick.

Dugang nga nadiskobrihan usab nga duna diay usa ang namatay sa maong sunog ug nahibaw-an nga gisunog og tuyo ang maong balay sa suspek nga si Melecio nga miresulta sa pagkaapil sa iyang kapuyo.

Si Romnick niangkon sa kapulisan sa Carcar nga siya ang nagsunog sa ilang balay.

Gihulagway ni Espinosa ang suspek wala sa insaktong panghunahuna nga gituohang ubos sa gahom sa gidiling drugas subay sa iyang mga lihok.

Dugang ni Espinosa nga gidunggab una ni Romnick ang iyang asawa sa pila ka higayon usa pa gisunog ang balay.

“Maoy ingon sa mga tawo didto, Sir nga sa wala pa ang pagka sunog sa balay sa magtiayong Melecio nakabantay ang pila ka mga silingan sa managtiayong Melecio nga nakakita sa ilang panaglalis,” matod ni Espinosa.

Mag-atubang og kasong parricide ang suspek nga si Romnick samtang ang masuso nga bata niini anaa una karon sa kustodiya sa ilang Women's and Childrens Protection Desk Personnel.

Si Barangay Kapitan Lucio Lastima sa Liburon nahinabi sa Superbalita Cebu, nagkanayon nga nakurat sila sa panghitabo ug nagtuo nga pangabubho maoy nag-unang motibo sa krimen.

Matod ni Lastima, isip pangulo sa barangay, niabot sa iyang dunggan dunay laing uyab ang babaye nga usa ka langyaw sa ilang dapit.

Dugang ni Lastima, giingong sa mga istorya nga nasayod na niini ang kapuyo nga lalake apan gipasagdan human nakabenepisyo silang duha sa kuwarta gikan sa langyaw.

Ug nianang gabii sa wala pa ang sunog, nabati sa mga silingan ang panaglalis sa duha.

Matod ni Lastima, ang duha niabot sa ilang dapit human nakapalit og luna sa dapit gikan sa iyang kabanay ug nagnegosyo og pisa sa mga motorsiklo.

Si Lastima nagkanayon nga makig-alayon siya sa imbestigasyon sa kapulisan. (Dugang ni RRM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph