DUNGAN sa selebrasyon sa Chinese New Year, nihatag og lingaw sa mga Gingoognon ang Globe uban sa sa lokal nga kagamhanan sa Gingoog City.
Ang kalihokan gipahigayon sa pahayahay sa pantalan sa Gingoog City kung diin dinapit nga bisita nga mihatag lingaw ang sikat nga banda sa siyudad sa Cagayan de Oro nga mao ang Inside City. Ang Gingoog City band milingaw sab sa Gingoognons.
Si Pernell M. Feliciano, kinsa Misamis Oriental-Cagayan de Oro-Camiguin Area Sales head sa Globe, niingon nga pormal nilang gilusad ang Home fiber internet sa Gingoog City tungod kay ilang nakita nga gikinahanglan kini sa katawhan sa siyudad ug dili malimitahan ilang pagamit sa internet.
Sa kantidad nga P1,899 modawat karon panahona og sign ups ang Globe sa Gingoog ug kapin sa 200 ka households ang ilang pagadawaton labina nga limitado usa lamang sa sentro sa siyudad ang ilang mahatag nga linya ug koneksyon. Sa kantidad nga P1,899 ma enjoy na sa pamilya ang 1 gigabyte speed sulod sa ilang puloy-anan.
"Ang fiber optics gi launch nato sa Gingoog kay kini mas paspas siya ug mao ang atong pinakabag-o nga facility. Sa Gingoog man gud kita namo nga kinahanglan ang mas taas nga technology, ug nagpasabot kini nga booming ilang ekonomiya dinhi," matud ni Feliciano ug niingon nga garbo kini sa siyudad sa Gingoog ang paglusad nila kay labing unang siyudad sa Misamis Oriental nga ilang giprayoridad nga mas mapalambo ang teknolohiya.
Buot pa usab palamboon sa Globe ang ilang koneksyon sa katawhan sa Gingoog pinaagi sa pagbukas sa nagkalain laing LTE cellsites aron sab ang mga mobile phone users mas paspas ang connection sa internet.
"Magpadayon kami nga motabang ug patig coordinate sa LGU Gingoog para mapalambo ang atong internet access dinhi sa inyong siyudad," matud ni Feliciano.
Dungan sa kalihokan ang pagturn over sa Globe sa 100mbps nga koneksyon alang sab sa Gingoog.
Dako sab ang kalipay ni Gingoog City Mayor Erick Cañosa sa lain na usab nga kalamboan sa siyudad.
"We would like to thank Globe sa pagsuporta sa atong kalihokan. After sa Cagayan de Oro dako ang atong pagpasalamat kay first in Misamis Oriental ang dakbayan sa Gingoog nga aduna na kitay 100mbps nga fiber ug gihatagan kita sa kahigayonan sa Globe nga mopaspas ang atong internet connection bout pasabot nga dinhi sa Gingoog daghan gyod ga engage sa social media," matud ni Cañosa.
Ang pagbukas sab sa Cafe U-Night by the Bay matigayon na matag gabii sa adlawng Biyernes ug Sabado nga mohangtod na sa kapistahan ug Charter Day sa siyudad.