GIDEKLARANG patay ang duha ka mga lalaki, usa niini polis, human gisulod ang ilang panimalay sa wala mailang suspetsado niadtong Enero 23, 2020 mga alas 8:45 sa gabii sa Purok 6B, Barangay Santiago, Iligan City.
Giila ang mga biktima nga mao sila si Police Corporal Samuel B. Banuelos, 42, minyo, aktibong sakop sa Philippine National Police nga nadestino sa Sagiaran Municipal Police Station ug residente sa susamang dapit kinsa nakaangkon og lima ka mga samad pinusilan.
Laing kauban niini giilang si Junjun Sanchez, 43, kasamtangan nagpuyo sa puloy-anan ni Banuelos kinsa nakaangkon sab og upat ka samad pinusilan.
Sa imbestigasyon sa Iligan City Police Station 1 sa pagpangulo ni Police Major Rixell C. Torayno, nasuta nga ang insidente nasaksihan sa anak nga babaye sa polis nga samtang anaa sulod sa puloy-anan, kalit lang misulod ang wala mailang suspek ug gipamusil ang mga biktima.
Ang maong insidente nalabyan sab sa mga minor de edad ug nadungog ang sunod-sunod nga kusog nga mga buto, hinungdan nagdangop sa barangay hall kung asa adunay mga barangay tanod ug gi-report ang insidente.
Daling gi-adtoan sa mga rescuer sab ang duha ka mga biktima apan dead on arrival nga gideklarar sa mga doktor paghatod sa balay tambalanan.
Gisusi sab sa operatiba sa Scene of Crimes Operatives ang crime scene ug nahipos ang ubay-ubay nga basyo sa bala sa kalibre 45.
Ang mga patayng lawas sa mga biktima gidala na sa Mary Venus Funeral Homes sa dapit kung diin pamilya nangayo pa og pagsabot ug dili pa mohatag og dugang detalye kalabot sa insidente.
Ang kapolisan nihimo na og kaugalingon nga lakang aron maimbestigahan unsa ang motibo sa pagpatay sa polis ug miangin sa laing kauban sa balay lakip sab ang pag-ila sa suspek.