HALAS ang lakip nakuha sa City Local Environment and Natural Resources Office (Clenro) atol sa ikaupat nga hugna sa pagpanguha og water lilly/water hyacinth niadtong Enero 24 sa Cagayan de Oro River sa siyudad sa Cagayan de Oro.
Ubay-ubay ka mga water hyacinth ang nakuha atol sa kalihokan nga gipahigayon sa tinugyanan sa Clenro kauban ang Environment Management Bureau (EMB)-Department of Environment and Natural Resources (DENR)-Northern Mindanao ug Philippine Coast Guard (PCG) apan lakip usab niini ang halas, labi na cobra.
"Cobra na dakpan atol sa pag panghinlo sa water lily diha sa CDO (Cagayan de Oro) river karong adlawa (Enero 24). Ingon niini ka risgo ang mga taga Clenro aron lamang mahinlo ang atung palibot. Kung nag amping lang unta kita sa paglabay sa atong mga basura ug mga waste water, wala or minus ra unta ang gidaghanon sa water lily nga motubo sa atong kasubaan," pahayag ni Cuenca sa post niini sa social media.
Gibutyag ni Cuenca nga ilang gipangkuha ang water hyacinth mentras wala pa niini na-okupar ang tibuok suba ug mentras dili pa ting-ulan.
"Kung moabot ang May, paspas kaayo ang pagtubo sa water hyacinth. Kung moabot nag May, posibleng wa nay makitang tubig pulos na gyud water hyacinth," matud ni Cuenca.
Gidugang pa nga dili usab kini hutdon gumikan kay duna man usab kini function labi na diha sa pagsala sa mga toxic chemicals ug uban pa.
"Dili siya hutdon kay naa siyay special function mura gyud siya og part of biodiversity kay ang water hyacinth siya ang mo filter sa mga heavy metals," dugang niini.
Pasabot usab sa pagdaghan sa water hyacinth nga hugaw kaayo ang kanal tungod kay kung walay hugaw dili usab motubo ang mga water lily o water hyacinth.