KUMPIYANSA ang lokal nga kagamhanan sa siyudad sa Cagayan de Oro nga makab-ot ang P7.5 bilyones nga target alang sa budget karong tuiga labi na nga mas nisaka ang koleksiyon karong panahona.
Anaa na sa P757 milyones ang koleksiyon gikan Enero 2 hangtod Enero 24.
Gibutyag ni Konsehal George Goking, tsirman sa Trade and Commerce, nga malipayon silang ibutyag sa katawhan sa siyudad nga dako na ang nakolekta nga buhis.
"We are happy to tell the people of Cagayan de Oro that as of today (January 24), we have collected P757 million sa buhis gikan sa business permit, real property tax ug uban nga mga taxes that is due for Cagayan de Oro," matud ni Goking.
Gihangyo ni Goking ang mga negosyante nga magbayad na tungod kay kini na ang pinakaulahing lugway ug duna nay multa ang magbayad sa human sa Enero 31.
"Akong hangyo sa tanan go to the city hall, ayaw paghulat sa deadline kay subject to penalty namo after January 31st," matud pa.
Mas dako usab matud karong tuiga kumpara sa nilabay nga tuig sa susama nga mga panahon diin anaa sa mga P500 milyones lang ang nakolekta.
"Pasalamat ta, ang indicator nga dako kaayo og pagsalig ang mga katawhan sa Cagayan sa pagdala sa panggobyerno sa Cagayan de Oro," dugang usab niini.
Gipasalig usab nga walay tax increase o pagsaka sa buhis.