SUPERBALITA CAGAYAN DE ORO

Cepalco, Moresco 1 ipatawag aron ipasabot ang bayrunon sa kuryente

BUOT ni Konsehal Edna Dahino nga makigtagbo sa mga electric service provider dinhi sa dakbayan sa Cagayan de Oro aron ipasabot ang bayrunon sa kuryente.

Kini human nga nagpadangat og special report niadtong nilabay nga Lunes, Enero 20, kalabot na sa "Murang Kuryente Law" ug nagduso og resolusyon pag-awhag sa Department of Energy (DOE) ug Department of Finance nga mapadali ang Implementing Rules and Regulations (IRR).

Gibutyag ni Dahino nga buot niini nga ipatawag ang nagtunol og serbisyo sa kuryente dinhi sa dakbayan labi na ang Moresco 1 ug Cepalco.

"I would like to call on our electric service providers Cepalco or the Moresco 1 to explain to us the other enumerating power charges included in our billing statements so that the general public will have a better understanding of what we have been paying for," matud ni Dahino.

Giingong buot niini nga mapasabot sa publiko kung unsa kining mga nakalatid sa mga billing sa kuryente aron masabtan sa tanan.

"Atong gihangyo nga ma-clarify nila na unsa gani atong gipamayran kay ngano ba gyud katag-as kaayo nga mga bill," dugang pa.

Buot niini nga masuta usab nga unsay mawala nga mga charges diha sa billing statement panahon nga maimplementar na sa hingpit ang nahisgutang balaod apan dili pasabot usab nga walay positibo o rason sa mga charges diha sa mga billing statement.

"Karon with the signed law nga unsa sab ilang gipangbutangbutang didto nga mawala na kana, mao man gud atong gusto nga naay mawala sa ilang bill," dugang niini.

Murang Kuryente Law

Samtang gipanghingusgan usab ni Dahino nga hingpit na nga magpagawas og IRR sa nalagdaan na nga balaod mismo ni Presidente Rodrigo Duterte nga Murang Kuryente Law niadtong Agusto 2019.

Nasayran nga kini nga balaodnon nagtugot sa gobyerno sa paggahin og P208 bilyones nga share sa gobyerno gikan sa Malampaya natural gas project alang sa balayrunon sa mga stranded contract cost ug stranded debts.

Gibutyag ni Dahino nga kung duna nay IRR hingpit na nga mapahimoslan sa katawhan ug sa publiko ang kaayohan niini nga balaod labi na nga makuhaan na ang balayrunon sa kuryente.

"We just want to receive the benefit from that law," matud ni Dahino.

"Kung naa nay IRR supposedly maka-receive na ta og reduction kay 90 days lugar pag-approved kung nabuhatan dayon og IRR automatically maka enjoy napud ang tao sa reduction sa gastos sa electric bill, mao na ang pinaka essence anang Murang Kuryente law," dugang niini.

Gidugang pa usab nga pinaagi sa IRR dili na mag-antos ang katawhan sa pagbayad sa mga balayrunon nga dili ang katawhan ang nigamit.

"Mag-antos man ang tawo sa pagbayad adto kita naman ang magbayad nga dili man kita ang naggasto adto kumbaga dili kita ang nag gamit sa ila tong agreement sa una," dugang ni Dahino.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph