BALAY ug hustisya ang gipasalaig ni Mayor Oscar Moreno ngadto sa pamilya sa namatay nga leadman human gibundakan og hollow block ang nawong didto sa 15th de Septiembre St. Cor Varquez, Barangay 1, Balingasag, Misamis Oriental.
Nibisita si Moreno niadtong Enero 24 sa haya ni Argie Libaton Tresquio, 28, sa iyang panimalay sa Kahoa Pasil, Barangay Pita, Kauswagan, siyudad sa Cagayan de Oro.
Gitunol usab ni Moreno ang hinabang nga kwarta, mga kape, bugas ug uban pa.
Sa pakighinabi kang Moreno, giingong wala kini nahimutang sa dihang nasayran ang panghitabo ug nakita ang kuha sa closed circuit television (CCTV) camera ug nakurat sa nakita.
"I was shocked I could not believe it, mao ng nangita ko og pamaagi nga makaanhi para personally makita nakong pamilya mapaabot ko ang pahisubo ngadto kanila para matabangan sab sila, looy biya naningkamot lang tawon, nanarbaho," matud ni Moreno.
Gidugang pa ni Moreno nga looy kaayo ang kahimtang sa biktima labi na nga duna kini duha ka mga anak nga ang amahan nga tigulang na usab ang nag-atiman.
Gani ang ilang panimalay anaa sa kanipaan ug kung magtaob mosaka ang tubig sa ilang dapit.
"I am in shocked, I cannot believe mga mahitabo kini, yes akong gi-invite ang amahan nga moadto sa opisina kay atong matagaan og housing unit," matud ni Moreno.
Samtang emosyonal usab ang amahan sa biktima nga si Cesar nga mismong si Moreno ang nibisita kanila ug nagtunol og tabang.
"Akong kaguol murag nakuha-kuhaan kay gitabangan mi sa mayor. Nagpasalamat ko'g dako nga wa mi niya biya-e. Mayor salamat kaayo sa imong gihatag nga bugas ug kwarta," matud ni Tresquio.
Samtang sa pagsulat niini nga balita, padayon ang panawagan niini nga motahan na ang mga responsable.
Nasayran nga duna nay lima ka mga suspetsado ang gitakdang pasakaan na og kasong murder karong adlawa, Lunes, Enero 27, 2020.
Gitakdang ilubong ang patay nga lawas karong umaabot nga petsa 30 ning bulana.